ՀՀ փաստաբանների պալատը նախաձեռնել է «Սիրիահայերին իրավական աջակցություն» փաստաբանական ծրագիրը: Նախաձեռնության մասին այսօր լրագրողներին մանրամասներ ներկայացրեց պալատի նախագահի խորհրդական Զինավոր Մեղրյանը:
Ըստ նրա՝ ծրագիրը բաղկացած է երկու փուլից:
Առաջին փուլով՝ ՀՀ փաստաբանների պալատում իրականացվելու է սիրիահայերի անվճար իրավաբանական խորհրդատվություն, որը նպատակ է հետապնդում նրանց իրավագիտակցության բարձրացումը:
Ծրագրի երկրորդ փուլով նախատեսվում է ամփոփել սիրիահայերին հուզող հարցերի շրջանակը, որոնք առնչվում են ՀՀ օրենսդրությանը, պատրաստել երկլեզու՝ արևելահայերեն, արևմտահայերեն ձեռնարկ և այն անվճար տարածել սիրիահայերի շրջանում:
Կարդացեք նաև
Ըստ պարոն Մեղրյանի՝ Փաստաբանական պալատի ներկայացուցիչները մինչ ծրագիրը նախաձեռնելը հանդիպել են սիրիահայ համայնքի անդամների հետ: «Մենք արդեն հիմնական ուսումնասիրություն կատարել ենք, հիմնական թիրախային հարցերը, որոնք առնչվում են սիրիահայերի կեցությանը Հայաստանում, այդ իմաստով արդեն նույնիսկ նյութեր կան պատրաստված, օրինակ` անշարժ գույքի վարձակալության հետ կապված պայմանագրի ձեւաթղթեր ենք պատրաստել, որոնք տրամադրվելու են խորհրդատվություն այցելած սիրիահայերին»,- ասաց Զինավոր Մեղրյանը:
Սիրիահայերը կարող են նաեւ իրենց հարցերը տեղադրել նախաձեռնության անունով բացված ֆեյսբուքյան էջում եւ ստանալ դրանց պատասխանն առցանց:
Ըստ պարոն Մեղրյանի՝ այս ծրագիրը նաեւ քայլ է, որով մենք պետք է ամեն ինչ անենք, որ այս մարդիկ Հայաստանից էլ չարտագաղթեն, այլ մնան Հայաստանում:
Հռիփսիմե ՀՈՎՀԱՆՆԻՍՅԱՆ
