ՀՀԿ երիտասարդական կազմակերպության ներկայացուցիչները հունվարի 20-24-ը Թբիլիսիում մասնակցել են «Կոնրադ Ադենաուեր» գերմանական հիմնադրամի կողմից կազմակերպված «All tomorrow’s parties» («Ապագայի բոլոր կուսակցությունները») խորագրով ծրագրին։ Հայ երիտասարդներից բացի, ծրագրին մասնակցել են նաև երիտասարդ քաղաքական գործիչներ Ադրբեջանից և Վրաստանից:
Ծրագրում անդրադարձ է եղել Հարավային Կովկասում կուսակցական համակարգի առանձնահատկություններին, ինչպես նաև՝ Գերմանիայում կուսակցությունների համակարգմանն ու գործունեությանը։
Գործնական աշխատանքների ժամանակ մասնակիցներն օգտագործել են ամառային սեմինարին ձեռք բերած իրենց գիտելիքները և ներկայացրել հատուկ պատրաստված նախագծեր։ Հանձնաժողովը, որի կազմի մեջ մտնում էին Ազատության, ժողովրդավարության և զարգացման կովկասյան ինստիտուտի, Վրաստանում Եվրոպական հանձնաժողովի պատվիրակության, Վրաստանում Գերմանիայի Դաշնության դեսպանատան ներկայացուցիչներ, հաղթանակը շնորհել է ՀՀԿ երիտասարդական կազմակերպության անդամներ Տաթև Խոսրոևայի, Հայկ Մամիջանյանի և Գրիշա Ամիրխանյանի ներկայացրած «Dialogue. Youth for change» («Երկխոսություն. երիտասարդությունը՝ հանուն փոփոխությունների») ծրագրին։
ՀՀԿ երիտասարդական կազմակերպության անդամ Հայկ Մամիջանյանը, անդրադառնալով սեմինարին, նշեց, որ ծրագրի ընթացքում ադրբեջանցի երիտասարդները հատկապես նշում էին իրենց երկրում ժողովրդավարության պակասը և մարդու իրավունքների կոպիտ ոտնահարումները։ Եվ հայաստանյան պատվիրակության ներկայացուցիչներն այդ համատեքստում շահեկան դիրքերում էին։ «Քննարկումների ընթացքում իրականացվեցին սիմուլյացիոն խաղեր, որոնք կոչված էին տարածաշրջանային հիմնախնդիրների լուծման նոր ուղիների ստեղծմանը: Դասընթացների ժամանակ տրամադրվում էին գիտելիքներ, որոնք անհրաժեշտ են ապագա քաղաքական գործիչների կուսակցական աշխատանքի համար։ Կարևորվում էր թիմային առաջնորդության ինստիտուտի զարգացումը։ Հանրապետական կուսակցության պատվիրակությունը ներկայացավ որպես ԵԺԿ քաղաքական ընտանիքի լիիրավ անդամ՝ նախաձեռնելով հնարավորինս բաց և արդյունավետ քննարկումներ Հարավային Կովկասում ԵՄ դերակատարության և Հարավային Կովկասում առկա տարածաշրջանային խնդիրների վերաբերյալ»,- նշեց Հայկ Մամիջանյանը։
ՀՀԿ երիտասարդական կազմակերպություն
Վաա~յ մեզ, որ դրանք են երկիր ներկայացնում`պայթուցիկ փուչիկների տեսքով…