«Եվրասիա» միջազգային համալսարանի «Եվրասիա» բանավեճի ակումբը՝ «Բաց հասարակության հիմնադրամներ-Հայաստան» գրասենյակի օժանդակությամբ «Երիտասարդները բանավեճում» ծրագրի շրջանակներում, այսօր կազմակերպել էր հանրային բանավեճ-քննարկում «Զինծառայողները չպետք է մասնակցեն ընտրություններին» թեմայով: Միջոցառմանը ներկա էին բանավեճի ակումբի անդամները, կուսակցությունների ՝ մասնավորապես ՀՅԴ, ՀՀԿ կուսակցությունների երիտասարդ ներկայացուցիչները, Երիտասարդական խորհրդարանի անդամներ:
«Եվրասիա» բանավեճի ակումբի պատասխանատու Նունե Ջոմարդյանը նշեց. «Բանակը կարեւոր դեր է կատարում մեր երկրի անվտանգության, խաղաղության պահպանման համար, որը ոչ միայն մեր ներքին խնդիրն է, այլ կարեւոր է տարածաշրջանային առումով»:
Նա անչափ կարեւորեց բանակի՝ ընտրություններին մասնակցել-չմասնակցելու հարցի քննարկումը, քանի որ այն բազմաթիվ այլ խնդիրների հետ է կապվում:
Երիտասարդական խորհրդարանի անդամ, ՀՅԴ ներկայացուցիչ Ազատուհի Սիմոնյանը կարծիք հայտնեց, թե բանավեճի թեման բազմաթիվ հարցականներ է պարունակում. «Այսօր այս դահլիճում հավաքվածների մեծ մասը կարծում է, որ Սահմանադրական լուրջ փոփոխությունների կարիք կա: Ես օրինակ բանավեճը կվերագրեի «Արդյոք զինծառայողները ընտրություններին մասնակցում են իրենց կամընտրությամբ»: «Արդյոք քվեաթերթիկի վրա զինվորը նշում կատարելիս իրենց կամքն են կատարում»:Ազատուհու համոզմամբ, պետք է հետամուտ լինել զինծառայողի իրավունքի ճշգրիտ կատարմանը, որովհետեւ զինվորը լիարժեք քաղաքացի է:
Կարդացեք նաև
Նա բերեց Իտալիայի օրինակը. «Եթե Իտալիայում սովորական շարքային քաղաքացին չմասնակցի ընտրություններին, կտուգանվի, դա պարտք է քաղաքացիական, զինվորն էլ նույն քաղաքացին է՝ զինվորական համազգեստով»:
Բանավեճին մասնակից, բանակում ծառայած անդամներից մեկին հարց ուղղվեց՝ Ձեզ է՞լ են ստիպել քվեարկել ոչ Ձեր ցանկությամբ: Երիտասարդը ժպտալով ասաց. «Կնախընտրեի չպատասխանել այդ հարցին»:
«Ես դեմ եմ, որ զինծառայողները չմասնակցեն ընտրություններին, այդ կերպ մենք կխախտենք նրանց ազատ արտահայտվել եւ իրավունքը: Ընտրությունների արդյունքները բոլորի, այդ թվում զինծառայողների համար են»,-ասաց բանավեճի ակումբի մեկ ուրիշ անդամ:
Բանավեճի ակումբի անդամներից Քնարիկ Գալուստյանն էլ հավելեց. «Ընտրությունը կամքի արտահայտման ձեւ է, զինվորականները թիրախային խումբ են, նրանք գտնվում են պետական իշխանության ներքո, հետեւաբար չեն կարող արտահայտել իրենց իրական իրավունքը»:
Աբրահամ անունով բանավեճի մասնակիցն ասաց, որ փորձը ցույց է տալիս, որ ի վերջո բոլոր զինվորները ընտրությունների ժամանակ իրենց ձայնը պարտադրաբար կամ ստիպված տալիս են իշխող ուժին
ՀՀԿ ներկայացուցիչ Գոհար Մկոյանը ասաց, որ ՀՀԿ ներկայացուցիչ լինելը չի ենթադրում, որ պետք է իր ասածներին միայն հակասեն: Նրա համոզմամբ, ցանկացած ոք ընտրում է՝ ինչպես ցանկանում է: Ինչ վերաբերում է բանակին, Գոհարի ասելով, բանակում էլ բավականին դրական փոփոխություններ են իրականացվել. «Երբ զինվորը ընտրություն է կատարում, զինվորի՞ դիրքից է նշում կատարում քվեաթերթիկում, թե՞ որպես ՀՀ քաղաքացի, սոցիալականացման ճգնաժամերը չհաղթահարա՞ծ բանակ է, թե՞ ընտրության իրավունքը հոգով կատարող մարդ»:
ՀՅԴ ներկայացուցիչը հակադարձեց ՀՀԿ-ականին. «Ողջ երկրում «քուչի տղերքը» եւ 5000-10000 դրամները եղանակ են փոխում, եթե բանակում մեկ հոգի հրաման է տալիս ու բոլորը ընտրում են նրա ասածին, ինչի՞ մասին է խոսքը: Իրավիճակի միակ ճանապարհը իշխանափոխությունն է»:
Մանրամասները ՝ տեսանյութում
Գոհար ՀԱԿՈԲՅԱՆ
