Բնապահպանության նախարարության այս տարվա գերակա խնդիրներն են` Սեւանա լճում էնդեմիկ ձկնատեսակների պոպուլյացիայի համալրումն ու Սյունիքի մարզում կենսոլորտային տարածքի ստեղծման ծրագրի իրականացումը: Այս մասին այս լրագրողների հետ հանդիպման ժամանակ ասաց բնապահպանության նախարար Արամ Հարությունյանը:
Նրա ներկայացմամբ` 2014 թվականի համար պետական բյուջեով հատկացվել 2.3 միլիարդ դրամ. իրականացվելու է 23 ծրագիր:
Նախարարի խոսքերով` տարեկան 60 միլիոն դրամ է հատկացվում պետբյուջեից Սեւանա լճի էնդեմիկ ձկնատեսակների պաշարների համալրման համար: Ծրագրով նախատեսվում է լիճ բաց թողել մոտ 166 հազար 600 Գեղարքունի մանրաձուկ, եւ 200 հազար ամառային իշխանի մանրաձուկ:
Նախարարության մյուս գերակա խնդիրը` Սյունիքի մարզում կենսոլորտային տարածքի ստեղծման ծրագրով, ինչպես ասաց նախարարը, նախատեսվում է UNESCO-ի չափանիշներին համապատասխան կենսոլորտային արգելոցի ստեղծման հիմքերի նախապատրաստումը: Ծրագրի տարածքը ներառում է «Շիկահող» պետական արգելոցը, «Արեւիկ» ազգային պարկը, «Սոսու պուրակ», «Զանգեզուր», «Խուստուփ», «Բողաքար» պետական արգելավայրերը, եւ 20 հուշարձան: Այս ծրագրի համար նախատեսված է 8.25 միլիոն եվրո, նախարարությունն իրականացրել է ծրագրի իրագործման հայտերի մրցութային փուլը, առաջիկայում էլ կհայտարարվի իրականացնող կազմակերպության ընտրության միջազգային մրցույթ:
Կարդացեք նաև
Արամ Հարությունյանի մամուլի ասուլիսի մանրամասներն` առաջիկայում:
Նելլի ԲԱԲԱՅԱՆ
