«Արմսվիսբանկ», «Հայաստանի էլեկտրական ցանցեր», ՀՀ մանկապարտեզներ, դպրոցներ, «Գարանտ ինշուրանս». սրանք այն կազմակերպություններն են, որտեղ ճնշումներ են գրանցվել աշխատակիցների նկատմամբ կապված նրանց աշխատավարձերից 5 և ավելի տոկոսների փոխանցման հետ:
Այսօր «Մեդիա կենտրոնում» պարտադիր կուտակային կենսաթոշակային օրենքի հետ կապված խնդրահարույց հարցերի վերաբերյալ քննարկման ընթացքում «Դեմ եմ» նախաձեռնության անդամները խոսեցին ճնշումների և դրանց դեմ պայքարի մեխանիզմների մասին:
«Դեմ եմ» նախաձեռնության անդամ, քաղաքագետ Դավիթ Մանուկյանն ասաց. «ՍԴ որոշման արդյունքում վեճի առարկան տեղափոխվել է գործատու-աշխատող հարթություն: Հիմա վեճեր են գնում այն մասին, թե որ գործատուն է հաշիվներին փոխանցումներ կատարել, պահումների հետ կապված հաշվապահների շրջանում վեճեր են: Որպես այդպիսին ՍԴ-ի կողմից՝ փոխանցելու մասին նորմը կասեցված չէ, կասեցված է չկատարելու համար պատասխանատվության ենթարկելու նորմը: Այսինքն՝ գործատուն կարող է չկատարել: Այլ հարց է՝ գործատուն աշխատողի կողքին է, թե՝ ոչ»: Դավիթը կոչ արեց պետական մարմիններին ոչ թե շոուբիզնեսին հատուկ ակցիաներ անել, թե «ընտրեցի ֆոնդ», այլ ՍԴ որոշումը կիրարկելու հետ կապված իրավական ակտեր ընդունվեին, որն ապահովվեր ՍԴ-ի՝ օրենքը հակասահմանադրական ճանաչելու որոշման պրակտիկ գործունեությունը: Այնուհետև ֆինանսների նախարարին հիշեցրեց. «Հունվարի 16-ի դրությամբ ֆոնդ ընտրած անձանց թիվը 1309 է: Այսինքն՝ մեզ խորհուրդներ պետք չէ տալ, որ մենք մեզնից թվեր ենք հրապարակում»:
Դավիթ Մանուկյանը տեղեկացրեց նաև, որ շարժումը ընդլայնվել է՝ տեղափոխվելով նաև մարզեր ու փետրվարի 8-ին Վանաձորում հավաք-երթ է կազմակերպվելու:
Կարդացեք նաև
«Դեմ եմ» նախաձեռնության անդամ, իրավաբան Գևորգ Հայրապետյանը խոսեց այն մասին, թե ինչպես կարելի է ճնշումների դեմն առնել. «Գիտեմ, որ կան աշխատակիցներ, որոնք դիմումով դիմել են գործատուին, խնդրել չփոխանցել իրենց այդ հինգ և ավելի տոկոսները և հայտնել այն մասին, որ օգտվելով ՍԴ որոշումից դեռ չեն պատրաստվում ընտրել որևէ ֆոնդ, որ հետո պատճառաբանություններ չանեն, թե չգիտեինք, զգուշացնեիք: Իսկ մամուլի հրապարակումները՝ ճնշումների մասին առաջարկում եմ, որ ոստիկանությունը ընդունի որպես հաղորդում: Իսկ ճնշումների մասին պետք է դիմել ոստիկանություն, որպես պետական մարմինների կողմից իր ստորադասների նկատմամբ պաշտոնական դիրքի ու լիազորությունների չարաշահում»:
Պետական հիմնարկությունների աշխատակիցների ճյուղային արհմիության նախագահ Անահիտ Ասատրյանը խոսեց աշխատանքային հարաբերություններում վախի մթնոլորտի մասին ու ասաց. «ՀՀ նախագահն ասաց, որ իրենք ամաչում են կենսաթոշակառուների համար այս իրավիճակում: Իշխանությունը և բոլորս պիտի ամաչենք, որ պետական աշխատողները վարձատրվում են այնքան, որ իրենց աշխատավարձով չեն կարողանում ապահովել իրենց ընտանիքի բավարար կենսամակարդակը և աշխատում են վախի մթնոլորտում: Մենք կասեցման պահից դիմել ենք բոլոր արհմիություններին և առաջարկել դիմումի ձև, որով կարող են կոլեկտիվներն ու անհատները դիմել գործատուներին: Մենք աշխատում ենք աշխատողների շրջանում տարածել այն, որ իրենց՝ ֆոնդ ընտրելու պարտադրանքը կասեցված է»:
Հայաստանի արհեստակցական միությունների խորհրդի իրավաբանական բաժնի պետ Միքայել Փլիպոսյանն էլ նշեց. «Այսպիսով Սահմանադրությունն է խախտվում, որտեղ հստակ նշված է, որ յուրաքանչյուր ոք իր հայեցողությամբ իրավունք ունի տնօրինելու իր գույքը»:
Տաթև ՀԱՐՈՒԹՅՈՒՆՅԱՆ
