«Ամեն ինչ պետք է անենք, որ պարտադիրը, պարտադրանքը վերացվի: Մեզ ոչ ոք չպետք է պարտադրի: Մենք միտք չունենք հաշտվելու պարտադրանքի հետ»:
Այդ մասին այսօր Վանաձորում կազմակերպված հանդիպման ժամանակ ասաց ընդդեմ Պարտադիր կուտակային կենսաթոշակային համակարգի վանաձորյան նախաձեռնության անդամ Հովհաննես Ղազարյանը:
Նա նկատեց, որ օրենքի պարտադիր բաղադրիչը չի բխում ոչ ՀՀ քաղաքացու սահմանադրական իրավունքից, ոչ էլ շահերից:
Կարդացեք նաև
«Օրենքի բացասական կողմերից մեկն այն է, որ աշխատավարձը յուրաքանչյուր անձի սեփականությունն է, մեր Սահմանադրությունը սահմանում է, որ ոչ ոք իրավունք չունի անձի սեփականության նկատմամբ ոտնձգություն կատարել, սեփականության իրավունքը պաշտպանված է մայր օրենքով, եւ սեփականության նկատմամբ որոշակի կիրառումներ կարող են կատարվել միայն դատարանի որոշմամբ»:
Բացի այդ` ըստ Հովհաննես Ղազարյանի` օրենքի ընդունման ընթացքում չեն կազմակերպվել, չեն ապահովվել հանրային քննարկումներ, որոնց ժամանակ շահագրգիռ բոլոր կողմերը հանդես կգային իրենց դիրքորոշումներով, մտավախություն կարտահայտեին եւ կփորձեին ընդհանուր հայտարարի գալ որոշում ընդունողների հետ:
«Ավելին, ներկայացվում է հինգ տոկոս, սակայն, իրականում հինգ տոկոս չի պահվում: Գումարը պահվում է մաքուր աշխատավարձից, որի հետեւանքով այն գերազանցում է հինգ տոկոսը»,-նշում է Հովհաննես Ղազարյանը:
Ընդդեմ Պարտադիր կուտակային կենսաթոշակային համակարգի վանաձորյան նախաձեռնության անդամ Ռազմիկ Էվոյանն էլ հավելում է, որ օրենքում պարտադրանք չպետք է լինի:
«Պարտադիր բաղադրիչը պետք է պարտադիր չլինի: Հասկանում ենք, որ անհրաժեշտ է կենսաթոշակային ֆոնդ ստեղծել, ավելացնել այդ ֆոնդը, որպեսզի ավելի բարեկեցիկ ծերություն ապահովվի քաղաքացու համար, բայց երբ որ իշխանությունը իր նախաձեռնությամբ կպչում է նաեւ քաղաքացու սահմանադրական իրավունքին, քանի որ ստիպում է, պարտադրում է` իր սեփական միջոցները չգիտես ինչ հիմնադրամների միջոցով կուտակել,այն դեպքում, երբ այդ հիմնադրամը ոչ լրիվությամբ պետք է գործի ՀՀ-ի ներսում. կա որոշակի տոկոսային հարաբերություն: Բացի այդ մեր կառավարությունը բավարար երաշխիք չի տալիս այդ ֆինանսական միջոցների համար»,-ասում է քաղաքացիական նախաձեռնության անդամը:
Նախաձեռնության շրջանակներում նախատեսվում են անց կացնել տարբեր բնույթի խաղաղ ակցիաներ, երթեր, հավաքներ:
«Եթե ՍԴ-ն սահմանադրական համարեց օրենքը, մենք էլի շարունակելու ենք պայքարը: Այս դեպքում ստիպված կլինենք ընտրելու քաղաքացիական անհնազանդության ճանապարհը: Եթե այս միջոցներն օգուտ չտվեցին, մենք անցնելու ենք կոշտ միջոցների»,-եզրափակեց Հովհաննես Ղազարյանը:
Անուշ ԲՈՒԼՂԱԴԱՐՅԱՆ
