Հունվարի 23-ին Տերնիի առևտրի պալատի նստավայրում, Իտալիայում ՀՀ դեսպանության հովանու ներքո տեղի ունեցավ «Ներդրումային հնարավորությունները Հայաստանում» խորագրով գործարար համաժողով:
Համաժողովի կազմակերպիչներն էին` Իտալիայում ՀՀ դեսպանությունը, կենտրոնական Իտալիայում Զարգացման Հայկական գործակալության ներկայացուցիչը և Տերնիի առևտրի պալատը:
Համաժողովի աշխատանքներին մասնակցեցին թեթև արդյունաբերության, սննդի վերամշակման, դեղագործության, զբոսաշրջության, տեղեկատվական տեխնոլոգիաների, վերականգնվող էներգետիկայի, ծխախոտի արտադրության և բանկային ոլորտներում ներգրավված շուրջ 50 իտալական ընկերությունների ներկայացուցիչներ:
Համաժողովի մասնակիցներին ներկայացվեցին Հայաստանում առկա բիզնես միջավայրը, բիզնեսի զարգացման և ներդրումների համար ստեղծված նպաստավոր պայմանները, այդ թվում` նաև ազատ առևտրի գոտիների առկայության փաստը:
Իտալիայում ՀՀ դեսպան Սարգիս Ղազարյանը համաժողովի մասնակիցներին ուղղված իր խոսքում անդրադարձավ երկու երկրների միջև տնտեսական հարաբերություններում վերջին տարիներին արձանագրված առաջընթացին, Հայաստանի կառավարության կողմից իրականացվող բարեփոխումներին, ինչպես նաև մասնակիցների ուշադրությունը հրավիրեց միջազգային վարկանիշային հեղինակավոր հաստատությունների կողմից Հայաստանին տրվող գնահատականների դրական դինամիկայի վրա:
Համաժողովի մասնակիցները պատրաստակամություն արտահայտեցին առաջիկա ամիսներին կազմակերպել Տերնիի նահանգի մի խումբ գործարարների այց Հայաստան` ներդրումային հնարավորությունները տեղում ուսումնասիրելու նպատակով:
Համաժողովի շրջանակներում դեսպան Ղազարյանը հարցազրույց է տվել իտալական «Ումբրիա 24» պարբերականի թղթակցին, որի հունվարի 24-ի համարում տպագրվել է «Հայաստանում ներդրում կատարելը` շահավետ է» խորագրով հոդվածը:
Հոդվածում, մասնավորապես, մեջբերված են ՀՀ դեսպանի` համաժողովին հնչեցված խոսքերն առ այն, որ Հայաստանի թե` քաղաքական և թե` տնտեսական տեսանկյունից կայուն զարգացման, ինչպես նաև որակյալ ու մատչելի աշխատուժի և ազատ առևտրի գոտիների առկայության ու միաժամանակ նաև կառավարության շարունակական ջանքերի շնորհիվ, երկրում ստեղծվել են բավականին նպաստավոր պայմաններ արտաքին ներդրումների համար: Հոդվածում անդրադարձ է եղել նաև ՀՀ դեսպանի այն դիտարկմանը, որ Հայաստանը իտալացի ներդրողների համար կարող է կամուրջ հանդիսանալ թե` տարածաշրջանի և թե` Ռուսաստանի և Կենտրոնական Ասիայի երկրների շուկաներ առավել շահավետ ձևով դուրս գալու համար:
ՀՀ ԱԳՆ
