Ինչպես Aravot.am-ին տեղեկացրեց Ախուրյանի գյուղապետ Արծրուն Իգիթյանը՝ այսօր սպանություն է տեղի ունեցել իրենց համայնքում: Ախուրյանի հիվանդանոցի հետևի թաղամասի առանձնատներից մեկում` Պարույր Սևակ 4-րդ նրբանցքում, տղան սպանված է գտել հորը և մորը:
Գյուղապետի ասելով, ընտանիքի հայրը` Գարեգին Հակոբյանը, կոշիկի բուդկա ուներ գյուղում, կոշիկի վերանորոգմամբ էր զբաղվում, իսկ կինը չէր աշխատում: Գյուղապետի բնութագրմամբ, անշառ ընտանիք էին `խմելուց, կռիվներ սարքելուց հեռու: Ամուսինները մոտ 50 տարեկան էին, նրանք ունեն երկու տղաներ, որոնցից մեկն ամուսնացած է, բոլորը միասին են բնակվում, տղայի հարսանիքը մի շաբաթ առաջ էր:
Նորապսակ տղան եկել է տուն ու ծնողներից երկուսին էլ սպանված է գտել: Այժմ դեպքի վայրում աշխատում են իրավապահները: Գյուղում խոսակցություններ են պտտվում այն մասին, որ ամուսինն է սպանել կնոջը, հետո` իրեն: Սակայն սրանք ընդամենը խոսակցություններ են, դեպքի մանրամասները կպարզի նախաքննությունը:
ՀՀ ոստիկանության տարածած պաշտոնական տեղեկատվության համաձայն. «Հունվարի 29-ին, ժամը 13.20-ին, ոստիկանության Երևան քաղաքի վարչության օպերատիվ կառավարման կենտրոնից ոստիկանության Ախուրյանի բաժնում հաղորդում է ստացվել, որ իրենց է զանգահարել մի քաղաքացի և հայտնել, որ եղբայրը` 1962 թ. ծնված Գարեգին Հակոբյանը, և նրա կինը` 1965 թ. ծնված Մանիշակ Հակոբյանը, Ախուրյան գյուղի իրենց տանը սպանել են միմյանց: Դեպքի վայր մեկնած օպերատիվ խումբը հայտնաբերել է ամուսինների դիակները` պարանոցները կտրված վիճակում: Ոստիկանության Շիրակի մարզի քննչական բաժնում ՀՀ քրեական օրենսգրքի 104 հոդվածի հատկանիշներով հարուցվել է քրեական գործ: Կատարվում է նախաքննություն»
Կարդացեք նաև
Նունե ԱՐԵՎՇԱՏՅԱՆ
