«Հայաստանում քաղաքական մենաշնորհի արդյունքում ձևավորվել է մի այնպիսի դաշտ, երբ պետական ծառայողների մեծամասնությունը աշխատում է իշխող կուսակցության համար: Նրանցից շատերը հաճախ իրենց անձնական ինտերնետային էջերն օգտագործում են, որպեսզի պաշտպանեն իշխող կուսակցության շահերը»,-այսօր ԵԽԽՎ ամբիոնից այսպիսի կարծիք հայտնեց հայկական պատվիրակության անդամ ԲՀԿ-ական պատգամավոր Վահե Հովհաննիսյանը:
Ինչպես արդեն տեղեկացրել ենք, այսօր ԵԽԽՎ-ն քննարկում է տեղեկատվական տեխնոլոգիաների և ինտերնետի դերակատարությունը ժողովրդավարության կայացման գործում:
Իր ելույթում Վահե Հովհաննիսյանը շեշտադրում կատարեց այն հանգամանքի վրա, որ Հայաստանում տեղեկատվական միջոցները հաճախ օգտագործվում են երկրում քաղաքական մենաշնորհ ձևավորելու համար, ինչը լրջորեն վնասում է խոսքի ազատությանը: Պարոն Հովհաննիսյանը կասկածի տակ դրեց հայ պետական ծառայողների` սոցիալական ցանցերում արտահայտած կարծիքը ու նշեց, թե շատ հաճախ այն տարբերվում է նրանց իրական կարծիքից:
Քաղաքական մենաշնորհը Վահե Հովհաննիսյանը համարեց նաև լուրջ մարտահրավեր էլեկտրոնային ժողովրդավարության կայացման ճանապարհին: Նա նշեց, որ հիմնականում ֆինանսական միջոցներ կիրառելով իշխանությունները վնասում են էլեկտրոնային ժողովրդավարացման գործընթացին, երբ ամեն ինչ արվում է սևացնելու քաղաքական ընդդիմախոսներին:
Կարդացեք նաև
Վահե Հովհաննիսյանը նշեց, որ նման տեխնոլոգիաներ հիմնականում կիրառվեցին 2012-ի խորհրդարանական ընտրություններում:
Անդրադառնալով ադրբեջանական քարոզչությանը ինտերնետում`Վահե Հովհաննիսյանը մտահոգություն հայտնեց, որ ադրբեջանական սոցիալական ցանցերում երբևէ չի հանդիպել հանդուրժողականության մասին որևէ արտահայտություն, փոխարենը հանդիպել է միայն ատելության խոսքի տարածմանը:
ԵԽԽՎ լիագումար նիստում հանդես եկավ Եվրոպական խորհրդարանի նախագահ Մարտին Շուլցը: Նա շեշտեց, որ յուրաքանչյուր կառավարություն պետք է ապահովի խոսքի և մամուլի ազատությունը: Այնուհետև անդրադարձ կատարեց Ուկրաինայում տեղի ունեցող իրադարձություններին: Նա նշեց, որ այս հարցում ելքի միակ ճանապարհը երկխոսության ապահովումն է:
Այնուհետև փոքրիկ միջադեպ տեղի ունեցավ: Պատվիրակներից մեկը, որին թույլ չտվեցին ելույթ ունենալ, իր երկրի դրոշը բարձրացրեց և սկսեց աղմկել:
Հայաստանի պատվիրակության անդամ Նաիրա Զոհրաբյանը բարձրացրեց չճանաչված պետությունների վերաբերյալ` ԵԽԽՎ ապրիլի 7-ի բանաձևի կիրառության հարցը ու նկատեց, որ գրեթե ոչինչ արված չէ այդ առումով: Մարտին Շուլցը խուսափեց հստակ պատասխան տալ ու նշեց. «Կարծում եմ, որ այս հարցերը պետք է Մինսկի խմբի աշխատանքների շրջանակներում լուծվեն, ես պետք է հետազոտեմ այդ հարցը, հետո տամ պատասխան»:
Տաթև ՀԱՐՈՒԹՅՈՒՆՅԱՆ
