Վարչական դատարանում ոստիկանի օրինական պահանջը չկատարելու համար վարչական պատասխանատվության ենթարկելու պահանջով քննվում է նաեւ Ոստիկանությունն ընդդեմ ակտիվիստ Կարեն Հարությունյանի գործը:
Այսօր նախնական դատական նիստում ՀՀ ոստիկանության ներկայացուցիչը պատմեց, որ օգոստոսի 27-ին գիշերը 01-ի սահմաններում Կարեն Հարությունյանը ու բողոքի ցույցի այլ մասնակիցներ պառկել են քաղաքապետարանի աստիճանահարթակին, պատրաստվել են գիշերել այդ հատվածում: Ոստիկանները պահանջել են հեռանալ, որովհետեւ. «Հակաօրինական է դռների մոտ քնելը: Պահանջել են մուտքից հեռանալ մի փոքր: Պառկելով քաղաքապետարանի գլխավոր մուտքի հենց աստիճանահարթակին Կարենը փակել է քաղաքապետարանի մուտքն ու ելքը, չնայած ուշ ժամ է եղել, բայց բացառված չէ, որ ցանկացած պահի, աշխատողները կարող էին աշխատանքի բերումով մուտք գործել քաղաքապետարան, իսկ մուտքի մոտ քնելով ակտիվիստը խոչընդոտ կհանդիսանար ազատ ելումուտին»:
Նա նաեւ ասաց, որ քաղաքապետարանը պահպանվող օբյեկտ է, ոստիկաններն էլ հասարակական անվտանգությունն են ապահովել:
Կարեն Հարությունյանի փաստաբան Արտակ Զեյնալյանը այս գործով էլ հակընդդեմ հայց ներկայացրեց` պահանջելով ճանաչել իր վստահորդի ազատ խոսքի իրավունքի, անձնական ազատության եւ անձեռնմխելիության փաստի խախտումը եւ ոչ իրավաչափ ճանաչել ոստիկանների գործողությունները: Հետո հավելեց, որ չեն ընդունում ՀՀ ոստիկանության ներկայացրած հայցի ոչ պահանջը, ոչ էլ դրա հիմքում ընկած փաստական հանգամանքները. « Իմ վստահորդը պառկած չի եղել քաղաքապետարանի մուտքի մոտ»:
Կարդացեք նաև
Ոստիկանության ներկայացուցիչները չհամաձայնեցին հակընդդեմ հայցի այն փաստերին, որ նշված օրը նշված ժամին քաղաքապետարանի դիմաց եղել են երեք ցուցարար, պնդեցին որ 10-15 ակտիվիստ է եղել եւ չընդունեցին, որ ոստիկանների թիվը գերազանցել է ակտիվիստների թվին: Նրանք պնդեցին նաեւ, որ ոստիկանները ներկայացրել են ոստիկանություն տանելու իրավական հիմքերը, չընդունեցին, որ բռնությամբ են տարել բաժին. «Ֆիզիկական ուժ չի կիրառվել, բայց հոժարակամ էլ չեն նստել»:
Ոստիկանության ներկայացուցիչը չընդունեց, որ բերման ենթարկված ակտիվիստին ոստիկանությունում պարզաբանվել է` պաշտպան ունենալու նրա իրավունքի մասին, ասաց ծանուցում են ներկայացրել, ակտիվիստը հրաժարվել է նայել ու դրա տակ ստորագրել, բայց հրաժարման կամ ծանուցումը ներկայացնելու փաստի առթիվ ասաց՝ արձանագրություն չեն կազմել:
Ոստիկանության ներկայացուցիչները միջնորդեցին որպես վկա դատարան հրավիրել Կարեն Հարությունյանին եւ ոստիկան Հունան Գզիրյանին, որն էլ պահանջը ներկայացրել է ակտիվիստներին:
Ակտիվիստներն էլ կատակեցին ու ոստիկանի ազգանունը բառախաղ դարձրին. «Գզիրն ընկավ դռնեդուռ»:
Արտակ Զեյնալյանը միջնորդեց գործին կցել դեպքի տեսագրությունը եւ որպես վկաներ հարցաքննել ակտիվիստներ Վահագն Մինասյանին, Գոռ Առաքելյանին, Սուրեն Սահակյանին եւ Գայանե Մելքոնյանին: Դատարանը վկաների հարցաքննության միջնորդությունը հետաձգեց` տեսագրությունը ուսումնասիրելուց հետո ըստ նպատակահարմարության պատճառաբանությամբ:
Դատարանի որոշմամբ, հայցվորը պարտավոր է հիմնավորել պատասխանողի հակաօրինական արարքը, ոստիկանների ներկայացրած օրինական պահանջները եւ վիճելի փաստերը, թե արդյոք Կարեն Հարությունյանը դեպքի օրը քաղաքապետարանի դիմաց պառկած է եղել ու ինչ կարգով են ոստիկանները նրան բերման ենթարկել:
Թե ակտիվիստ Վահագն Մինասյանի, թե Կարեն Հարությունյանի գործով դատական հաջորդ նիստը նշանակվեց փետրվարի 19-ին: Ակտիվիստ Կարեն Հարությունյանն էլ դատական նիստից հետո մեզ հետ զրույցում ասաց, որ ոստիկանության ներկայացուցիչները մի շարք հանգամանքների վերաբերյալ ստում են:
Մեկ այլ ակտիվիստի` Գարեգին Յավուրյանի գործով դատական նիստը հետաձգվեց հենց սկզբում կրկին մինչեւ փետրվարի 19-ը պատասխանողի գտնվելու վայրը պարզելու համար: Ըստ Արտակ Զեյնալյանի՝ նա զորակոչվել է բանակ:
Արփինե ՍԻՄՈՆՅԱՆ
