ԵԽԽՎ պատգամավոր, Լատվիայի ներկայացուցիչ Լոլիտա Չիգանը երեկ հայտնեց, որ Փոստանջյանի՝ պատվիրակությունից դուրս հանվելու հարցը անձամբ է բարձրացրել։ «Ես տիկին Փոստանջյանին պատվիրակությունից հեռացնելու հարցը բարձրացրեցի, որովհետեւ նկատել էի, որ նա փոխարինվել է ուրիշ անդամով՝ «Օրինաց երկիր» կուսակցությունից, որը իշխանական կուսակցությունից է։ Ես հիշում եմ, որ այս փոխարինումը եղել է անմիջապես ՀՀ նախագահին ԵԽԽՎ այցի ընթացքում տված նրա պրովոկատիվ հարցից հետո»,- մեր զրույցում ասաց եվրապատգամավորը։
Հայաստանի պատվիրակության անդամները փորձել են բացատրություններ գտնել եվրոպացի պատգամավորների համար եւ հայտնել, որ պատգամավորների փոխարինումը ոչ մի կապ չի ունեցել Սերժ Սարգսյանին հղած հարցի հետ։ Հայաստանյան պատգամավորները հայտնել են, որ փոխարինումը եղել է ռոտացիոն գործընթացով, որը հայ պատգամավորների հետ համաձայնեցվել է 2012 թվականի սկզբին։ «Նրանք ինձ մոտեցան եւ բացատրեցին, որ դեռ 2012-ին տիկին Փոստանջյանը տեղեկացվել է, որ պատվիրակության կազմի փոփոխություն պետք է տեղի ունենա»,- ասել է եվրապատգամավորը։
Իրականում հայկական պատվիրակության կազմում ռոտացիոն սկզբունք կիրառելու մասին քննարկումներ եղել են պատվիրակության ձեւավորման նախնական քննարկումների փուլում, երբ խոսվում էր, թե որ ուժերը ինչ համամասնությամբ պետք է այնտեղ ներկայացված լինեն եւ ինչ սկզբունքով պետք է ձեւավորվի ԵԽԽՎ պատվիրակությունը։ Բայց ի վերջո քաղաքական ուժերը համաձայնության եկան, եւ ռոտացիայի վերաբերյալ այլեւս խոսք չկար։
Փոստանջյանը մտադրվել էր պատվիրակությունից իր դուրս գալու հարցը բողոքարկել եվրոպացի տասը պատգամավորների օգնությամբ, ովքեր նստաշրջանի մեկնարկին պետք է ոտքի կանգնեին եւ վիճարկեին հայաստանյան պատվիրակության լեգիտիմությունը։ Սակայն, նախօրեին ձմեռային նստաշրջանը մեկնարկեց առանց Զարուհի Փոստանջյանի, ուստի եւ որհւէ հարց չբարձրացվեց։ Փոստանջյանը, ինչպես արդեն տեղեկացրել ենք, չի կարողացել Ստրասբուրգ հասնել ֆինանսական խնդիրների պատճառով։
Կարդացեք նաև
Հարցին, թե Չիգանը եղե՞լ է այդ տասը եվրոպացի պատգամավորների շարքում, ովքեր պատրաստվում էին ոտքի կանգնել, վերջինս պատասխանեց. «Ես չեմ տեսնվել Զարուհի Փոստանջյանի հետ եւ նրա հետ ոչ մի կոնտակտի մեջ չեմ եղել դրանից հետո։ ԵԺԿ խմբում ես խոսել եմ նրա փոխարինման մասին՝ սկզբունքերից ելնելով»:
Թագուհի ՀՈՎՀԱՆՆԻՍՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
