Կոմիտաս 5 հասցեում բազմահարկ շենքի կառուցապատողին հաջողվել է դատարանի որոշմամբ հանել տալ շինարարության վրայի արգելանքը:
Շինարարությունը շարունակվում է, բնակիչներին էլ ոչինչ չի մնացել, քան երկարատեւ պայքարից հետո հաշտվել իրենց շենքի դիմաց բազմահարկ շենքի կառուցման հետ:
Բնակիչներից Գոհար Սահակյանը Aravot.am-ին պատմեց, որ դատարանը իրենց երկընտրանքի առջեւ էր դրել կամ պետք է կառուցապատողին 40,600 դոլարով փոխհատուցեին շինարարության ժամանակավոր կասեցման համար նրա կրած վնասների համար կամ էլ արգելանքը հանվելու է:
«Այդ գումարը չտրամադրեցինք, դատարանն էլ շինարարության վրայից արգելանքը հանեց, ու կառուցապտողը շինարարությունը շարունակեց: Եթե տեսնում ենք, որ դատական օղակները այսկերպ են հարցին լուծում տալիս, թելադրված որոշումներ ընդունում, բնակիչներին ուրիշ բան չի մնում, քան հաշտվելը»:
Կարդացեք նաև
Գոհար Սահակյանի խոսքով, վերին հարկերի նախագիծը վերջերս է իրենց ձեռքն ընկել, հիմա ուսումնասիրում են, տեսնեն` ինչ սխալներ կան նախագծում, ենթակայանի փորձաքննություններն են անցկացնում, իսկ պատասխանները ի վնաս բնակչի են. «Առողջապահության նախարարությունից ստացել ենք այսպիսի պատասխան, որ աղմուկի մակարդակն է բարձր, մագնիսական դաշտի մեծությունն է բարձր, բայց, ինչպես ասում են ` ուժեղի մոտ միշտ էլ թույլն է մեղավոր, հիմա մեր հարցն է»:
Նա նաեւ ասաց, որ բնակիչներն էլ են արդեն հոգնել ու պայքարողների թիվն էլ նվազել է. «Եղանակային պայմաններն էլ հօգուտ բնակիչների չեն, այս ձմռանն անհնար է դրսում կանգնել, այս պայմաններում հնարավոր չէ նույնիսկ ակտիվ պայքար սկսել»:
Արփինե ՍԻՄՈՆՅԱՆ
