Մի քանի օր առաջ ԱԻՄ նախագահ Պարույր Հայրիկյանը շատ կտրուկ հայտարարեց, թե բոլոր այն ուժերը, որոնք հանդես չեն գալիս ընդդեմ Մաքսային միության՝ ԿԳԲ-ի գործակալներ են:
Մասնավորապես, նա նկատի ուներ այն քաղաքական ուժերին՝ ԲՀԿ, ՀԱԿ, ՀՅԴ, որոնք պայքարում են կուտակային կենսաթոշակային համակարգի, գազային պայմանագրերի դեմ, սակայն դեմ չէին արտահայտվել Մաքսային միությանը միանալու ՀՀ իշխանությունների մտադրությանը:
Այսօր «Առավոտը» ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանից հետաքրքրվեց՝ արդյոք ինքը ԿԳԲ գործակա՞լ է: «Ոչ»,- պատասխանեց պարոն Մանոյանը: Գուցե ՀՅԴ-ն է իրականացնում ԿԳԲ-ական գործունեությո՞ւն՝ հարցրինք: Կրկին՝ «ոչ»:
Այդուհանդերձ, պարոն Մանոյանն ասաց, որ Հայաստանի ազգային անվտանգությանը, հարկ եղած դեպքում, ՀՅԴ-ն պատրաստ է օգնել:
Կարդացեք նաև
Ինչ վերաբերում է ԿԳԲ-ին, ապա, ըստ ՀՅԴ-ականի, Պարույր Հայրիկյանն ազատ է իր մտքերն արտահայտելու, բայց եթե նա մեղադրում է այլ քաղաքական ուժերին եւ գործիչներին «ԿԳԲ գործակալ» լինելու մեջ, ապա այլոք էլ կարող են նրան ուրիշ մեղադրանքներ ներկայացնել:
Մելանյա ԲԱՐՍԵՂՅԱՆ
