ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանը, այսօր «Փաստարկ» ակումբում գնահատելով սահմանի երկայնքով զինադադարի ռեժիմի խախտման դեպքերը, նկատեց, որ դրանց մեջ կա նաեւ միջնորդների՝ Մինսկի խմբի մեղսակցությունը՝ վերջիններիս կողմից անընդհատ «կեղծ հավասարակշռությունը» պահելու եւ հավասարապես երկու կողմերին՝ հայկական եւ ադրբեջանական, մեղադրելու առումով:
«Վաղուց ժամանակն է, որ Լեռնային Ղարաբաղի Հանրապետությունը որպես լիիրավ կողմ վերադառնա բանակցությունների սեղան, եւ միջնորդները դա պիտի ապահովեն, որպեսզի Ադրբեջանը հասկանա, որ իր այս վարքը չի կարող երկար շարունակել»,- ասաց Կիրո Մանոյանը:
Նա գտնում է, որ հայկական կողմը ադրբեջանական սադրանքներին համարժեք չի պատասխանում: Մասնավորապես, պարոն Մանոյանը կարծում է, որ այն բանից հետո, երբ ԱԳ նախարարների հանդիպման նախաշեմին Ադրբեջանը դիվերսիոն գործողություններով հանդես եկավ, հայկական կողմը պետք է ուղղակի չգնար այդ հանդիպմանը:
Ավելին, Ադրբեջանի նախագահ Իլհամ Ալիեւի՝ վերջին շրջանում շարունակվող հայտարարություններն այն մասին, որ Հայաստանը Ադրբեջանի պատմական տարածքն է, որը նրանք հետ են բերելու վաղ թե ուշ, պետք է հայկական կողմին առիթ տար դիմելու կտրուկ քայլերի, եւ մեր իշխանությունները պետք է հստակ արտահայտվեին այդ ելույթների կապակցությամբ, մասնավորապես՝ միջնորդներին զգուշացնեին, որ նման հայտարարությունները պետք է զսպվեն հենց միջնորդների կողմից:
Կարդացեք նաև
Պարոն Մանոյանը, իհարկե, մի կողմից ընդունում է, որ Ալիեւի հայտարարությունները երեւակայության արգասիք են, սակայն դրանց չպատասխանելը ճիշտ չի մեր իշխանությունների կողմից:
Մելանյա ԲԱՐՍԵՂՅԱՆ
