Կանաչների կուսակցության նախագահ Արմենակ Դովլաթյանը հույս ունի, որ Ուկրաինայում սկսված անկախական շարժումը կհասնի նաեւ Հայաստան: Նա ուրախ է, որ ընդդեմ պարտադիր կուտակային կենսաթոշակային համակարգի պայքարի դուրս եկածները կրթված, աշխատող, նորմալ աշխատավարձ ստացող երիտասարդներ են, մարդիկ, որոնք նախկինում ակտիվ չէին, սակայն հիմա ոտքի են ելել եւ իրենց շահերն են պաշտպանում: «Մինչեւ հիմա մեզ մոտ սոցիալական խնդիրներով պայմանավորված բռնկումներ չեն եղել, հիմնականում պայքարի են դուրս եկել ազգային հարցի հետ առնչվող խնդիրների կապակցությամբ, իսկ հիմա հասունանում է ժամանակը, որ սոցիալական դժգոհությունները բողոքի հսկայական ալիքներ առաջ բերեն: Կուտակային կենսաթոշակները, գազի գները եւ այլն… Պայքարը հասունանալու համար ժամանակ է պետք, հասունացման ժամանակ, հուսանք, որ այդ շրջանը կարճ կտեւի, պահանջներ կդրվեն իշխանությունների առաջ»,-ասաց պարոն Դովլաթյանը եւ միանգամից նկատեց, որ իշխանությունները այժմ գնում են այլ ճանապարհով: «Երբ հարց ես տալիս, ավելի ցինիկ պատասխան են տալիս: Եթե նախկինում մածունը տեսնելով ասում էին, որ այո, սա մածուն է, բայց սեւ մածուն է, հիմա միանգամից ասում են, որ դա ընդհանրապես մածուն չի»:
Մելանյա ԲԱՐՍԵՂՅԱՆ
