ՀՀ տրանսպորտի և կապի նախարար Գագիկ Բեգլարյանը հունվարի 24-ին ընդունեց Հայաստանում Իտալիայի նորանշանակ արտակարգ և լիազոր դեսպան Ջովաննի Ռիչուլլիին:
Նախարարը, շնորհավորելով դեսպանին Հայաստանում դիվանագիտական առաքելություն սկսելու կապակցությամբ, կարևորեց երկու երկրների միջև համագործակցությունը տրանսպորտի և հեռահաղորդակցության ոլորտներում:
Գագիկ Բեգլարյանը նշեց, որ հեռահաղորդակցության ոլորտում Իտալիայի հետ համագործակցության եզրեր գտնելու փորձեր են եղել, սակայն տարբեր պատճառներով չեն կայացել:
Խոսելով կապի ոլորտում գրանցած ձեռքբերումների մասին՝ նախարարը դեսպանին ներկայացրեց հայաստանյան հեռուստաեթերի թվայնացմանն ուղղված աշխատանքների ընթացքը, նշեց, որ արդեն պայմանագիր է կնքվել շվեդական «Էրիքսոն» ընկերության հետ, որն իրականացնելու է այդ գործընթացը:
Կարդացեք նաև
Ջովաննի Ռիչուլլին վստահություն հայտնեց, որ Իտալիայում ուրախ կլինեն մեծացնել Հայաստանի հետ համագործակցության շրջանակը տրանսպորտի և կապի ոլորտում:
Գագիկ Բեգլարյանն ընդգծեց, որ ՀՀ տրանսպորտի և կապի նախարարությունը պատրաստ է տարբեր ծրագրերով և առաջարկներով համագործակցել Իտալիայի հետ:
Հանդիպման ընթացքում քննարկվեցին նաև երկկողմ հետաքրքրություն ներկայացնող այլ հարցեր:
ՀՀ տրանսպորտի և կապի նախարարության
լրատվական ծառայություն
