Ադրբեջանը կատարում է դիվերսիոն գործողություններ, ինչպիսիք էին հունվարի 19–ի լույս 20–ի գիշերվա գործողությունները՝ յուրաքանչյուր միջազգային հանդիպումից առաջ , որը կապված է Հայաստանի հետ։ Կոնկրետ այս միջադեպը կապված էր 2 երկրների արտգործնախարարների առաջիկա հանդիպման հետ։ Այս մասին հայտնեց ադրբեջանագետ Սարգիս Ասատրյանը՝ « Տեսակետ» մամուլի ակումբում այսօր կայացած ասուլիսի ժամանակ։
Ըստ Ս. Ասատրյանի, Հայաստանի արտգործնախարարն այս միջադեպից հետո չպետք է խուսափի Ադրբեջանի արտգործնախարարի հետ հանդիպումից, այլ այդ հանդիպման ժամանակ պետք է բարձրացնի Ադրբեջանի կողմից հրադադարի պայմանագրի խախտման հարցը։
Ս. Ասատրյանը նշում է նաև, որ ադրբեջանական ԶԼՄ–ներն այսպիսի դեպքերին միմյանց հակադրող մեկնաբանություններ են տալիս։ Նրանք գրում են, որ Հայաստանն է խախտում հրադադարի պայմանագիրը և անցնում դիվերսիոն գործողությունների, սակայն միևնույն ժամանակ գրում են, որ Հայաստանը ապրում է վախի մթնոլորտում՝ վախենում է Ադրբեջանից։
Ըստ Ս. Ասատրյանի՝ միջազգային հանրությունը պատշաճ կերպով չի անդրադարձել հունվարի 19–ի լույս 20–ի դեպքին։ Ս. Ասատրյանի պնդմամբ՝ նրանց գնահատականը շատ թույլ էր և պետք է ամեն ինչ անել , որպեսզի այս դեպքը մեծ արձագանք ստանա։
Կարդացեք նաև
Ս. Ասատրյանը գտնում է, որ այսպիսի դեպքերն անընդհատ շարունակվելու են՝ յուրաքանչյուր միջազգային հանդիպումից առաջ, որը կապված կլինի Հայաստանի հետ։
Զառա ԱՍԿԱՐՅԱՆ
