Լվովի հարյուրավոր բնակիչներ այսօր հավաքվել էին մարզպետարանի մոտ՝ հանդիպում պահանջելով մարզպետ Օլեգ Սալոյի հետ: Հայտնում է «Ինտերֆաքս»-ը:
Ինչպես հայտնել է լրատվականի թղթակիցը, սկզբում հավաքվածները ցույց էին անում, այնուհետև որոշ մասնակիցներ կոչ են արել ներխուժել շենք, հանդիպել Սալոյի հետ և իմանալ նրա վերաբերմունքը Կիևում տեղի ունեցող դեպքերի մասին: Թեպետ ոստիկանները փորձում էին հանդարտեցնել կրքերը, սակայն ցուցարարներին հաջողվել է գրավել շենքը:
Լվովի քաղաքային խորհրդի «Սվոբոդա» կուսակցության պատգամավոր Լյուբոմիր Մելնիչուկը լրագրողներին ցույց է տվել մարզպետի ստորագրած հրաժարականի դիմումը: Ըստ նրա, ցուցարարները նրան ստիպել են անել դա:
«Մարդիկ նրան թուղթ ու գրիչ են տվել, ու նա գրել է դիմումը», – ասել է Մելնիչուկը:
Կարդացեք նաև
Արդեն մի քանի օր է, ինչ Լվովում ակտիվիստները փակել են ներքին գործերի նախարարության զորքերի մի մասի ճանապարհը, որպեսզի թույլ չտան նրանց Կիև գնալ: Նախօրեին քաղաքապետ Անդրեյ Սադովոյը հայտնել է, որ Լվովում չեն գործի հունվարի 16-ին ընդունված օրենքները:
«Ուզում եմ ասել, որ ամեն ինչ կանեմ, որ քաղաքում պահպանվի կարգ ու կանոնը: Հավատացնում եմ, որ օրենքները, որոնք ընդունվել են սահմանադրության խախտմամբ և առողջ մտքի բացակայությամբ, Լվովում ոչ ոք չի կատարի», – ասել է Սադովոյը:
Պատրաստեց Հովհաննես ԻՇԽԱՆՅԱՆԸ
