«Մենք ասել են` մի զանգեք, մենք ձեզ կզանգենք: Ուստի մենք նոր տեղեկություններ չունենք»,-Aravot.am-ի հարցին՝ Կարմիր Խաչի ներկայացուցիչները այցելել են Ադրբեջանում հայ ռազմագերի Հակոբ Ինջիղուլյանին, տեղեկություններ ունե՞ն այդ մասին, այսպես պատասխանեց Հակոբի մայրը՝ Գայանեն:
Ինչպես արդեն տեղեկացրել էինք, Հակոբի ընտանիքի անդամները Կարմիր Խաչի ներկայացուցիչներին նամակ էին փոխանցել, որ այն հասցնեն Հակոբին:
Իսկ օրերս Կարմիր Խաչի միջազգային կոմիտեի (ԿԽՄԿ) ներկայացուցիչներն այցելել են հայ ռազմագերի Հակոբ Ինջիղուլյանին: ԿԽՄԿ հայաստանյան պատվիրակության հաղորդակցման ծրագրերի պատասխանատու Զառա Ամատունին փոխանցել էր, որ տեղի է ունեցել տեղեկատվության փոխանակում. ԿԽՄԿ ներկայացուցիչները հայ ռազմագերուն են ներկայացրել նրա ընտանիքի ուղերձն ու որոշ տեղեկություններ նրա հարազատների մասին:
Այս մասին Հակոբի մայրը տեղեկություններ չուներ, միայն Aravot.am-ին փոխանցեց, թե սպասում են, որ իրենց զանգեն:
Կարդացեք նաև
Ղարաբաղ-ադրբեջանական սահմանի վերջին դիվերսիոն գործողություններում զոհված 19-ամյա զինվոր Արմեն Հովհաննիսյանի և Հակոբ Ինջիղուլյանի միջև զուգահեռներ անցկացնելու մասին, երբ Արմենին հերոսացնում են, Հակոբին՝ հակառակը, տիկին Գայանեից հետաքրքրվեցինք՝ ճի՞շտ է զուգահեռներ անցկացնելն ու ընդհանուր եզրեր գտնելը, տիկին Գայանեն պատասխանեց. «Այստեղ համեմատության բան չէ: Ամեն մեկն իր տեղն ունի: Այդ նյութն արդեն համացանցից հանվել է: Իմ գնահատականն այն է, որ մի հիմար, ապուշ մի բան գրում է, մյուսները վերցնում արտատպում են իրարից՝ առանց հասկանալու՝ ինչ է, ինչ են արտատպում»:
Տաթև ՀԱՐՈՒԹՅՈՒՆՅԱՆ
