«Մարտակերտի շրջանում թուրքի երկու դիակ՝ չեզոք գոտում մեր զինվորների աչքերով դեռ տեսանելի են: Իրենք չեն համարձակվում տանել իրենց դիակները: Ադրբեջանը բոլոր զոհերի մասին է լռում,-այսօր «Հենարան» մամուլի ակումբում լրագրողների հետ հանդիպմանը, անդրադառնալով ղարաբաղ-ադրբեջանական սահմանի վերջին դիվերսիոն գործողություններին այսպիսի կարծիք հայտնեց քաղաքագետ Լևոն Մելիք- Շահնազարյանը:
Անդրադառնալով միջազգային հանրության արձագանքին, քաղաքագետը նկատեց. «Միջազգային հանրություն չկա, կան առանձին կազմակերպություններ: Տվյալ դեպքում կարող ենք խոսել Մինսկի խմբի համանախագահների մասին: Նրանք երեք էլ արձագանքել են, որ տեղի է ունեցել նման դեպք: Բայց ԵԱՀԿ-ի գործունեությունն ուղղված է ոչ թե հարցի կարգավորմանը, այլ որ պատերազմը չվերսկսվի»: Պարոն Մելիք-Շահնազարյանն հավելեց. «Նրանց կրակոցները հետաքրքիր չեն, հետաքրքիր չէ՝ մեկը, թե՝ յոթը սպանվեցին: Նրանց համար կարևորն այն է, որ պատերազմը չվերսկսվի, որ նավթը և գազը չդադարեն այստեղից այնտեղ հոսել»:
Քաղաքագետը վստահեցրեց, որ սահմանամերձ գյուղեր չեն տարհանվել, իսկ պատերազմի վտանգ չկա:
Aravot.am-ը հետաքրքրվեց՝ դիվերսիոն գործողությունները կապվա՞ծ են ԱԳ նախարարների՝ առաջիկա հանդիպման հետ, Պարոն Մելիք-Շահնազարյանն ասաց. «Այս անգամ՝ ոչ: Այ, այս օրերի կրակոցներն ու լարվածությունն է սահմանում, որ պայմանավորված է այդ հանդիպմամբ: Իսկ դիվերսիոն վերջին գործողությունները կապված են հունվարի 20-ի հետ»:
Արդյոք այն, որ Մաքսային միության անդամակցելիս շահարկվում էր անվտանգության թեման, նման գործողությունների առկայությունը չի՞ վկայում այն մասին, որ դա անհիմն էր: Քաղաքագետը պատասխանեց. «Ոչ ոք մեր զոհերը չի հաշվելու բացի մեզանից: Իսկ երկրի անվտանգության մասին նման կարծիք հայտնել չեք կարող, քանի որ չեն տիրապետում ողջ ինֆորմացիային»:
Տաթև ՀԱՐՈՒԹՅՈՒՆՅԱՆ
