Այսօր Կիևում մահացած Սերգեյ Նիգոյանը նոյեմբերի 21-ին «Վկոնտակտե» սոցիալական կայքի իր էջում ՀԱՀԳԲ-ի (ԱՍԱԼԱ-ի) դրոշն էր տեղադրել: Այդ մասին գրառում է արել Կոնոնեկոմե բլոգերը՝ նաև տեղադրելով տեսանյութ, որտեղ Նիգոյանը հայկական դրոշի դիմաց խոսում է Հայոց ցեղասպանության մասին:
«Ապրիլի 24-ը Օսմանյան կայսրությունում հայոց ցեղասպանության զոհերի հիշատակի օրն է: Հինգ տարուց այդ տխուր օրը կնշվի 100-րդ անգամ», – տեսանյութում ասում է Նիգոյանը, – «1915թ. ապրիլի 24-ը մարդկության պատմության մեջ ամենամռայլ էջն է: Այդպես անմարդկային դեռ ոչ մի ազգի հետ չէին վարվել»:
«Թուրքերը վերացնում էին հայերին, քանի որ նրանք իրենցից ավելի խելացի էին, քանի որ նրանք ապրում էին իրենց հողի վրա», – շարունակում է նա, – «Ես ինքս կզբաղվեմ այդ հարցով, որ Թուրքիան ոչ միայն ճանաչի Հայոց ցեղասպանությունը, այլև վերադարձնի իրեն չպատկանող հողերը: Դրանք հայկական հողեր են, ու հայերը չպետք է նայեն Արարատին այնտեղից, որի դիմաց կանգնած են թուրք սահմանապահները»:
Բլոգերը ԱՍԱԼԱ-ի մասին գրում է, որ այն «ահաբեկչական կազմակերպություն է, որը պայքարում է Հայոց ցեղասպանության ճանաչման համար»: Իսկ վերջում հեգնում է, որ շուտով Մայդանում կարող է հայտնվեն «Կովկասյան Էմիրաթ» ահաբեկչական խմբի անդամներ:
Կարդացեք նաև
20-ամյա Սերգեյ Նիգոյանը մահացել է Կիևի ցույցերին մասնակցելու ժամանակ՝ «Դինամո» մարզադաշտի մոտակայքում: Ըստ ականատեսների, նա ստացել էր գլխի ու պարանոցի հրազենային վնասվածք:
Պատրաստեց Հովհաննես ԻՇԽԱՆՅԱՆԸ
