Երևանի քաղաքապետի առաջին տեղակալ Կամո Արեյանը ներկայացրել է 2013 թվականին Երևանի քաղաքապետարանի կողմից շինբարեկարգման, կոմունալ և բնապահպանական ոլորտներում իրականացված ծրագրերն ու ընթացիկ տարի նախանշված աշխատանքները: Հատկապես շինբարեկարգման բնագավառի համար 2013 թվականը աննախադեպ տարի է եղել: Ընդհանուր առմամբ ասֆալտապատվել է 2.5 միլիոն քմ տարածք, ինչը, ըստ Կամո Արեյանի, 6 անգամ գերազանցում է 2010 թվականի ցուցանիշը: Նորոգվել են գլխավոր ու երկրորդական փողոցներ, բակային տարածքներ, նախկին գրունտային ճանապարհներ, մայթեր և այլն: Միայն 33 փողոցներ հիմնանորոգվել են: Սալապատվել են բազմաթիվ փողոցների մայթեր ու արահետներ, ինչպես նաև Վարդան Մամիկոնյանի արձանին հարակից և Շառլ Ազնավուրի հրապարակները: Քաղաքապետի առաջին տեղակալը հատկանշել է 2 խոշոր ճանապարհաշինական հանգույցների կառուցումը, որոնցից Ուլնեցի-Ռուբինյանց 2.3 կմ երկարությամբ ճանապարհահատվածն արդեն հանձնվել է շահագործման, իսկ 2.6 կմ երկարությամբ Իսակով- Լենինգրադյան արագընթաց մայրուղին շահագործման կհանձնվի ընթացիկ տարվա առաջին կիսամյակում: Մի շարք փողոցներում թարմացվել կամ նորերով են փոխարինվել եզրաքարերը: Նախորդ տարի կառուցվել է 4 վերգետնյա անցում, ևս 7-ը կկառուցվի 2014 թվականին: 2013թ.-ին 4-րդ կարգի վթարային, քանդման ենթակա շենքերի 226 ընտանիքներ նոր բնակարաններ են ստացել Սիսակյան 22 և Մարգարյան 37 հասցեների նորակառույց շենքերից: Ծրագիրը կշարունակվի նաեւ այս տարի: Գարնանից Երևանի քաղաքապետարանը ձեռնամուխ է լինելու նաև բակային տարածքների նորոգման ու կառուցման աշխատանքներին։ Այս տարի էլ, ինչպես 2013 թվականին, մայրաքաղաքում 400 և ավելի նոր բակ է շահագործման հանձնվելու։ 2013թ. կառուցված 19 ֆուտբոլի մինի դաշտերի թիվն այս տարի ևս կհամալրվի:
Ձևավորվել և շահագործման են հանձնվել շուրջ 8 հա ընդհանուր մակերեսով զբոսայգիներ ու հանգստյան գոտիներ, անցկացվել է 20.3 կմ ընդհանուր երկարությամբ ոռոգման նոր ցանց: Կամո Արեյանը հատկանշել է, որ 2013 թվականը նաև բարենպաստ է եղել բնապահպանական ծրագրերի իրականացման առումով: Քաղաքի փողոցներին հարակից կանաչ գոտիները, այգիներն ու պուրակները համալրվել են 2.6 միլիոն ծաղիկներով, 50000 ծառերով և 16000 թփերով: Սիզամարգերի թիվն ավելացել է 3.2 հեկտարով: Նախկին սիզամարգերի վերականգնման ծավալն էլ կազմել է շուրջ 13 հեկտար: Քաղաքապետի առաջին տեղակալը հավաստիացրել է, որ վերը նշած բոլոր ուղղություններով 2014 – ին նախատեսվում է գերազանցել ցուցանիշները: Մասնավորապես, կվերականգնվեն Եռաբլուրի և «Փարոսի» բլրի անտառապատ տարածքները: 2013 թվականին շուրջ 77 կիլոմետրով ավելացել է արտաքին լուսավորության համակարգը: Թվով 176 բակերի և 15 փողոցների հերթը կհասնի առաջիկա ամիսներին: Զուգահեռաբար կիրականացվի թեքահարթակների կառուցման ծավալուն ծրագիր` շուրջ 40 մլն դրամ արժողությամբ: Այդ նպատակով 2013 թվականին համայնքային բյուջեից առաջին անգամ տրամադրվել էր 20 մլն դրամ, որի շրջանակում կառուցվել է 96 թեքահարթակ, ընդ որում, այդ հարցում հաշվի են առնվել հենց շահառուների առաջարկները:
2013-ին իրականացված ծրագրերից Կամո Արեյանն առանձնացրել է նաև շուրջ 10100 շենքերի հարթ և թեք տանիքների նորոգման, 1300 շենքերի շքամուտքերի բարեկարգման, բազմաբնակարան մի շարք շենքերի արտաքին մաքրման, ինչպես նաեւ վթարային կախովի պատշգամբների վերականգնման աշխատանքները: Երևանի քաղաքապետ Տարոն Մարգարյանի նախաձեռնությամբ այս ծրագիրը կշարունակվի նաև 2014 թվականին:
Քաղաքապետի առաջին տեղակալը նաև հավելել է, որ 2013 թվականին ամբողջովին լուծվել է թանգարանների, Երևանի քաղաքապետարանի ենթակայության երաժշտական և արվեստի դպրոցների, մշակույթի տների ու գրադարանների ջեռուցման խնդիրը: Իսկ առողջապահական հաստատությունների մասով էլ նշվել է, որ արդեն նորոգվել են 2 մանկական պոլիկլինիկաներ: Եվս չորսում նմանատիպ ու նաև ջեռուցման անցկացման աշխատանքներ կիրականացվեն այս տարվա ընթացքում: Բացի այդ, նախորդ տարի նորոգվել են նաև 29 նախադպրոցական ուսումնական հաստատություններ, ևս 25-ն էլ կնորոգվի այս տարի:
Կարդացեք նաև
Երևանի քաղաքապետարանի տեղեկատվության և հասարակայնության հետ կապերի վարչություն
