Այսօր Եռաբլուրում մայր հողին հանձնվեց հունվարի 19-ի լույս 20-ի գիշերը ղարաբաղա-ադրբեջանական սահմանին թշնամու դիվերսիոն հարձակման ժամանակ փոխհրաձգության հետեւանքով զոհված կրտսեր սերժանտ Արմեն Հովհաննիսյանի աճյունը:
Հուղարկավորության ժամանակ ՀՀ պաշտպանության նախարար Սեյրան Օհանյանն ասաց. «… Արմեն Հովհաննիսյանն այսօր լրացնում է այն կրտսեր հրամանատարների շարքը, որոնք անձնական օրինակով նաեւ արցախյան գոյապայքարի ժամանակ ստորաբաժանումները տարել են դեպի հաղթանակներ, իրենք զոհվել են եւ իրենց թափված արյունը միայն ու միայն մեր հայրենիքի անվտանգության ապահովումն է: Իհարկե` դժվար է: Թող ամպագորգոռ բառեր չթվան, որ Արմենն իր կյանքը տվել է հայրենիքին: Բայց, այնուամենայնիվ, սա է իրողությունը: Իրողություն, որի հետ մենք պիտի համակերպվենք, համակերպվել են բազմաթիվ ծնողներ եւ մենք` կորցնելով մեր մարտական ընկերներին: Բանակի ղեկավարությունն էլ այսօր յուրաքանչյուր նման դեպքի հետ մեկտեղ յուրաքանչյուրի հետ նույն ապրումներն է զգում:
Այսօր Արմենը գնում է հավերժական կյանք: Շատ կարճ իր երկրային կյանքում ինքն ապահովեց իր հավերժական կյանքը երկնքում: Ուզում եմ մեր ողջ անձնակազմի անունից եւս մեկ անգամ սփոփանքի խոսքեր ասել եւ համբերություն ցանկանալ առաջին հերթին Արմենի ծնողներին եւ մեզ բոլորիս: Եվ ասել հետեւյալը. Արմենը տվյալ մարտի ժամանակ ընկերների հետ միասին կարողացավ ետ մղել եւ մեծ կորուստներ պատճառել հակառակորդին, որն ունեցավ մի քանի զոհ եւ գրեթե 25 վիրավոր: Եվ նրանց, մինչեւ ատամները զինված ստորաբաժանումները մեր հասարակ զինվորների կողմից կատարած գործողությունների արդյունքում փախան, ետ շպրտվեցին: Արմենի կատարած սխրագործությունը շարունակական է: Անպայման մենք անելու ենք ամեն ինչ, որպեսզի ինչպես եղել է, այսօր էլ, բազմակի պարտված հակառակորդը պարտվի: Եվ դա անելու են մեր հասարակ, գուցե նաեւ շատ դեպքերում ֆիզիկապես այդ պատրաստության ցածր աստիճանով, բայց հայրենիքի նվիրյալ զինվորները, որոնցից, ինչպես միշտ, այսօր էլ հակառակորդի` նման պատրաստված ասկերները միշտ փախչում են: Մնաս բարով, Արմեն»:
Աշոտ ՀԱԿՈԲՅԱՆ
