«Դա այն նույն վտանգն է պարունակում, ինչ Ուկրաինայում համաձայն որի` քաղաքացիական հասարակության ներկայացուցիչները կարող են այդ նախաձեռնությունը վերցնել իրենց ձեռքը»,-Aravot.am-ի հարցին հնարավո՞ր է ընդդիմադիր հատվածի միավորում կենսաթոշակային, գազային խնդիրների շուրջ, այսպիսի կարծիք հայտնեց Կովկասի ինստիտուտի փոխտնօրեն Սերգեյ Մինասյանը:
Շարունակելով` նա հիմնավորեց. «Մենք ունենք չորս տարբեր բարոյախոսական և անձնական խնդիրներ ունեցող քաղաքական ուժեր, որոնք փորձում են մի գաղափարի շուրջ համախմբվել, որը ավելի շատ քաղաքացիական հասարակության, սոցիալ-տնտեսական խնդիրներից է բխում, այլ ոչ թե քաղաքական նշանակություն ունեցող քայլ է: Ու գուցե այդ ուժերի ոչ թե միացում լինի, այլ ավելի ակտիվ գործողություններ քաղաքացիական հասարակության բնագավառում, որը նորմալ ձևով չի ղեկավարվում նույն այս կազմակերպությունների կողմից: Նրանք փորձեցին այդ քաղաքացիական ընդվզումը ղեկավարել, բայց սա չի բացառում, որ նրանց մոտ չի ստացվելու, այլ կլինի հակառակը»:
Պարոն Մինասյանն այս իրավիճակը նմանեցնում է Ուկրաինայում ստեղծվածին ու մանրամասնում. «Քաղաքացիական կառույցները ավելի ռադիկալ ընկալումներ ու մոտեցումներ ունեն, քան քաղաքական ընդդիմության ներկայացուցիչները: Մենք ընտրություններից առաջ տեսանք, թե ինչպես քաղաքական այդ ուժերը թայմ աութ վերցրին և սեփական քաղաքական ուժը թուլացրին, առաջինը` ԲՀԿ-ն: Ուստի այդպես թուլացած արդյոք այդ ուժերը, եթե անգամ համագործակցեն և միանան էլ, կկարողանա՞ն այդ ալիքը ղեկավարել, թե` ոչ, դա մեծ հարց է ինձ համար»:
Տաթև ՀԱՐՈՒԹՅՈՒՆՅԱՆ
