«Այդ չորս կուսակցություններից երեքը եղել են իշխանության մեջ և նպաստել ժանտախտային այս վիճակի խորացմանը: Որպես ընդդիմություն էլ` մարդկանց դեպի վհատություն առաջնորդելու փորձառություն ունեն»,-«Առաջին լրատվական»-ի հետ զրույցում, անդրադառնալով հունվարի 18-ի համատեղ հանրահավաքին, նման տեսակետ հայտնեց քաղաքական ուսումնասիրությունների «Վերելք» հիմնադրամի նախագահ Արծրուն Պեպանյանը:
Շարունակելով իր միտքը՝ Պեպանյանը նշեց, որ այդ ուժերից չորրորդն էլ թերմտածված շարժումով վերջնականապես մեռցրեց փոփոխությունների հավատը մարդկանց մեջ: «Երևի արվածը քիչ են համարում, դրա համար ջանում են քաղաքականացնել սոցիալական բնույթի նախաձեռնությունները: Ասել եմ ու կրկնեմ՝ քաղաքական դաշտի հնաբնակ կուսակցություններից և ոչ մեկը ի զորու չէ դրական փոփոխությունների հասցնել հանրությանը, քանի որ իրենք չեն ճանաչում հանրությանը և միտք էլ չունեն ճանաչել: Կմիավորվեն նրանք, թե կպառակտվեն՝ միևնույնն է լինելու հանրության համար: Չե՞ք նկատել՝ որքան բուռն է պայքարում ընդդիմությունը, այնքան երկրի գործերը վատանում են, մարդիկ հիասթափվում, իշխանությունները՝ այլասերվում: Սոցիալական բնույթի նախաձեռնությունները հիմա դառնում են օրակարգային, և դրանց անհարկի քաղաքականացումը կարող է հիմա էլ երիտասարդությանը հոռետեսության հասցնել, քանի որ եթե դուք լինեիք իշխանությունների փոխարեն, ապա համոզված եմ, որ զիջումների չէինք գնա որևէ մեկի պահանջին, ով հրապարակավ հայհոյում է ձեզ կամ ձեզ ոչնչացնելու կոչեր անում»:
Արծրուն Պեպանյանի խոսքերով՝ սոցիալական բնույթի նախաձեռնությունները կարևոր են, և եթե անհարկի չքաղաքականացվեն, կմեծանա իշխանությունների կողմից լսելի լինելու հավանականությունը․ «Բայց և հարկ եմ համարում նկատել, որ որքան էլ ակտիվ ու լայնամասշտաբ լինեն այդ նախաձեռնությունները, երկրին էական դրական փոփոխությունների չեն հասցնի, քանի որ պայքարում են հետևանքների դեմ: Դրանց հիմքում ոչ թե գաղափար է, այլ խնդիր: Գաղափար պիտի մակածեր քաղաքական դաշտը, բայց այն ամուլ է, ու այս նախաձեռնությունները կուսակցությունները քաղաքականացնում են նաև խանդից դրդված»:
Մարիամ Գրիգորյան
Կարդացեք նաև
Նյութի մանրամասները կարդացեք սկզբնաղբյուր կայքում
