Այս մասին այսօր Aravot.am-ի հետ զրույցում դժգոհեց Շիրակի մարզի Ազատան գյուղի ավագանու անդամ Գևորգ Աբրահամյանը: Նշենք, որ հանրապետության երբեմնի հարուստ այս գյուղում մարդիկ առանձնատներում են բնակվում, մեծ մասինը երկհարկանի է, որը և կոմունալ վճարների թանկացման պայմաններում պատուհաս է դարձել գյուղացիների գլխին: Մեր զրուցակցի ասելով, իր տունը մեկհարկանի է` 225 քառ.մետր, որից ջեռուցվում է ընդամենը 145 քառ.մետրը, սակայն դարձյալ ճար ու հնար չկա, դեկտեմբեր ամսվա գազի վարձավճարը մոտ 150 հազար դրամ է կազմել` նախորդ տարվա 90 հազար դրամի փոխարեն:
«Մեր գյուղում երկհարկանի տները չափից դուրս շատ են, ամենաշատ խնայողություն անելու, ասենք գիշերները տունը չջեռուցելու, տան ոչ բոլոր սենյակները տաքացնելու դեպքում անգամ մեր գյուղի բնակիչը նվազագույնը 200 հազար դրամ պետք է ունենա ամեն ամիս սպառած գազի դիմաց: Եկեք, տեսեք, մեզ մոտ կարծես 91-92 թվականները լինեն, մարդիկ հաստ շորերով փաթաթված ստիպված հավաքվում են տան մեկ կամ երկու սենյակում, իրար գլխի լցված են ապրում, որովհետև չեն կարողանում էդքան գումար տալ:
Տների մեծ մասում ջեռուցման համակարգ է քաշած, բայց ստիպված անջատել են դրանք, փայտ ու ինչ ասես վառում են տաքանալու համար: Իսկ ամենաողբերգականը գիտեք որն է, մեր գյուղի առանձնատներից շատերի դռները արդեն փակ են. մեր տղամարդիկ աշխատելով դրսերում` Յակուտիայում,Մոսկվայում ու Ռուսաստանի կենտրոնական հատվածներում, կոմունալ վճարներ տալու փոխարեն ձմռան նախաշեմին գերադասեցին ընտանիքի մնացած անդամներին Ռուսաստան տանել, հետո էլ ասում են, թե ինչո՞ւ է երկիրը դատարկվում»,- ցավով նշեց Գևորգ Աբրահամյանը:
Կարդացեք նաև
Նունե ԱՐԵՎՇԱՏՅԱՆ
