Aravot.am-ը ժամանակին անդրադարձել էր այն խնդրին, թե ինչպես է Դավիթաշեն վարչական շրջանի նախկին ղեկավար, այժմ ԱԺ պատգամավոր Արթուր Գևորգյանը «Կրեպսոն» ընկերության նախագահ Արման Երեմյանին խաբել ու յուրացրել է նրա գումարները:
Իր հերթին Արթուր Գևորգյանը պատասխանել էր իր ընդդիմախոսին` նշելով, որ նման անձնավորություն ինքը չի ճանաչում:
Aravot.am-ին կրկին դիմել է Արման Երեմյանը, որը նոր մանրամասներ է ներկայացնում գործից: Նա մեզ հետ զրույցում տեղեկացրեց. «Երեկ Կենտրոն և Նորք-Մարաշ ընդհանուր իրավասության առաջին ատյանի դատարանում դատական նիստը հետաձգվեց: Այն արդեն երրորդ անգամ է հետաձգվում, և ընդհանուր գործընթացը մոտ երեք ամիս ձգձգվում է»:
Այնուհետև շարունակեց. «Կես ժամ շուտ էինք ներկայացել դատարան ու տեսանք, որ ժամատախտակի վրա մեր դատի մասին ոչ մի ինֆորմացիա չկա: Զանգեցինք` ասացին, որ պատճառը համակարգչային անսարքությունն է»:
Արման Երեմյանը նշեց, թե դեռ պարզ չէ, թե մինչև երբ է նիստը հետաձգվել: Քանի որ մեզ հետ զրույցում Արթուր Գևորգյանը վիրավորական արտահայտություններ էր թույլ տվել Արման Երեմյանի հասցեին, Արմանը արձագանքեց. «Չեմ ուզում իջնել նրա մակարդակին` ինձ թույլ տալով նույն բառերով պատասխանել նրան: Ուղղակի նշեմ այն, որ երկու տարի է՝ նա ԱԺ-ում պատգամավոր է, բայց երբևիցե չեմ տեսել ու նկատել, որ նա ինչ-որ օրինագծի շուրջ քննարկման մասնակցի, հարցուպատասխանի մեջ մտնի: Նրան իր կուսակցությունից չեն թողնում լուրջ նախագծերի քննարկմանը մասնակցել, քանի որ նրա մակարդակը, միտքը այն չէ: Պարզ է` ինչ-որ սիմվոլիկ պատգամավոր է: Չեմ ուզում ցածրանալ ու անդրադառնալ նրա խոսելուն»:
Որպես պատասխան` Արման Երեմյանն այսպես արտահայտվեց. «Երևան» սուպերմարկետների ցանցը շատ լուրջ ցանց է, և եթե որևէ մեկը դրա կայանատեղիում ինչ-որ բան կառուցել փորձի, ապա պատկերացնո՞ւմ եք հարցում անենք ու կտեսնենք, թե 1000-ից 999-ը ինչ կանվանի այդ մարդուն: Այսպես պատասխանեմ այն մարդուն, ով փորձում է ինքնահաստատման գոտի փնտրել»:
Տաթև ՀԱՐՈՒԹՅՈՒՆՅԱՆ
