«Իշխանական դաշտում փորձում են հանրության ուշադրությունն ամեն կերպ շեղել այսօրվա սուր սոցիալական իրավիճակից: Սա լուրջ մարտահրավեր է»,-այսօր «Հենարան» մամուլի ակումբում հայտարարեց ՀՀ նախագահի նախկին թեկնածու Անդրեաս Ղուկասյանը: Նա նշեց, որ այսօր բողոք են ներկայացնելու վերաքննիչ դատարան: Այդ քայլը պարոն Ղուկասյանը դիտարկեց որպես շանս իշխանություններին գազի գնի հետ կապված հարցերում քաղաքական քայլեր կատարելու առումով:
Անդրեաս Ղուկասյանը ժողովրդի դժգոհությունը համարում է ոչ միայն քաղաքացիական անհնազանդության հարց, այլ «ուղղակի մարդիկ չեն կարող այդ բեռը տանել»: Հարցին՝ ի՞նչ է կոչ անում քաղաքացիներին, պարոն Ղուկասյանը պատասխանեց. «Արդյունավետ կլինեն այն գործողությունները, որոնք քաղաքացիները կիրականացնեն միասնական: Անհատական չվճարումները կարող են բերել անհատական անջատումների, ցանկացած գործողություն, որ կլինի միասնական և կներկայացվի իշխանություններին որպես վերջնագիր, դա կլինի արդյունավետ»:
Պարոն Ղուկասյանը հույս հայտնեց, որ եթե այդ իրողության մեջ իրենց «հաջողվի քաղաքական ենթատեքստ առաջ բերել, դա կլինի արդյունավետ պայքար իշխանությունների դեմ, որը կբերի դրական արդյունքի»:
Aravot.am-ը հետաքրքրվեց հնարավո՞ր է այդ խնդիրների շուրջ համախմբվի ՀՀ ընդդիմությունը: Նա պատասխանեց. «Հունվարի 18-ի երթն այս տարվա՝ այդ ոլորտում պատրաստվող ամենալայն ակցիաներից կլինի, այն կլինի հարթակ՝ մոբիլիզացնել ուժերը: Խորհրդարանական ընդդիմությանը չեմ վստահում, չեմ հավատում, որ դրանց գործողությունները բխում են հանրության շահերից: Այդ ուժերն իրականում սատարում են մեկ կուսակցության մենաշնորհին: Մենք ունենք մեկ կուսակցություն, մյուսները դեկորատիվ դերակատարություն ունեն»:
Կարդացեք նաև
Ռոբերտ Քոչարյանի վերադարձի մասին պարոն Ղուկասյանն այսպիսի կարծիք հայտնեց. «Ընտրակաշառքով ընտրված Սերժ Սարգսյանին փոխարինել նույն կերպ ընտրված այլ գործիչով, չի փոխի երկրի իրավիճակը»:
Տաթև ՀԱՐՈՒԹՅՈՒՆՅԱՆ
