Հայաստանը Մաքսային միությանն անդամագրելու որոշումը մեր իշխող «նժդեհականները» ՝ Սերժ եւ Տիգրան Սարգսյանների գլխավորությամբ պատճառաբանում են հիմնականում գազի գնով։ Այսինքն, ըստ այդ պատճառաբանությունների, Հայաստանը պետք է դառնա ՄՄ-ի անդամ նաեւ այն պատճառով, որ հակառակ դեպքում Հայաստանը կստանա թանկ գազ։
Եվ ահա ՄՄ-ի անդամ դառնալու պատրաստակամության դիմաց Ռուսաստանը որոշեց այլեւս չբարձրացնել գազի գինը եւ նաեւ խոստացավ, որ մոտակա 5 տարում էլ չի բարձրացնի։ Եվ ուրեմն գազի այս գինն այն գինն է, որ ունենալու ենք շնորհիվ Մաքսային միությանն անդամակցելու։ Իսկ հիմա բերենք Մաքսային միության անդամ մյուս երկրներում բնակչությանը վաճառվող գազի գներն ու համեմատենք։ Ռուսաստանում բնակչությունը 1000 խմ գազի դիմաց վճարում է 126 դոլար։
Բելառուսում այդ ցուցանիշը 84 դոլար է, Ղազախստանում՝ 69 դոլար։ Իսկ Հայաստանում 380 դոլար է։ Փաստորեն ստացվում է, որ Հայաստանում բնակչությունն ուղիղ 3 անգամ ավելի շատ է վճարում գազի դիմաց, քան Ռուսաստանում, 4.5 անգամ ավելի շատ քան Բելառուսում, եւ 5.5 անգամ ավելի շատ, քան Ղազախստանում։ Այսինքն, եթե դուք գնացել եք գազի հաշիվը վճարելու եւ պարզել եք, որ վճարելու եք, ասենք, 60 հազար դրամ, ապա Ռուսաստանի ներքին գներով վերահաշվարկելու դեպքում դա կլիներ 20 հազար դրամ, Բելառուսի ներքին գներով՝ 13 հազար դրամ, իսկ Ղազախստանի ներքին գներով՝ 11 հազար դրամ։
Սա է այն «էժան» գազը, որ ստանում է ՀՀ բնակչությունը Հայաստանի ինքնիշխանությունը կորցնելու դիմաց:
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
