Այսօր Հանրապետության հրապարակում Կուտակային կենսաթոշակային նոր օրենքի դեմ ավտոերթ անցկացնող քաղաքացիներին անհայտ է` ինչու են ոստիկանները գրանցել բոլորի մեքենաների պետհամարանիշները:
«Պատճառը չգիտենք, բայց կատակում ենք` ոստիկանները գույքագրում էին անում»,- ասաց Լեւոն Հարությունյանը,- «Խախտում անող չի եղել այնտեղ, չեմ կարծում իրավախախտում գրանցելու համար գրանցեին, եթե խախտում էլ գրանցեն, կբողոքարկենք: Ինձ թվում է վերցնում էին պետհամարանիշները, որ վախեցնեն, լուրջ բան չկա հաստատ»:
Լեւոնի պատմելով, ավտոերթն անցավ այնպես, ինչպես ծրագրել էին ու նպատակին ծառայեց. «Մարդիկ իրազեկվեցին, իմացան` ինչ օրենք է գործում, ինչ է իրենց սպասվում: Քաղաքացիական այս անհնազանդությունը շարունակական է լինելու»:
Օրենքի ուժի մեջ մտնելն էլ ակտիվիստը չի համարում պարտություն. «Մենք մինչեւ վերջ գնալու ենք, քաղաքացիական անհնազանդություններն այնքան կլինեն, մինչեւ հետ վերցնեն իրենց օրենքը: Գռփում են մեր գումարները, սա համարում եմ գռփոցի»:
Կարդացեք նաև
ՀՀ ոստիկանության լրատվության վարչությունից չեն պարզաբանում` ինչու են գրանցել ակտիվիստների մեքենաների պետհամարանիշները: Աշոտ Ահարոնյանն ասաց, որ ոստիկաններն իրենց աշխատանքն են արել: Իսկ մեր հարցին` ակտիվիստները երթեւեկության կանոններ խախտե՞լ են ակցիայի ժամանակ, պարոն Ահարոնյանն ասաց` ավելացնելու ոչինչ չունեմ:
Արփինե ՍԻՄՈՆՅԱՆ
