-Պարոն Հակոբյան արդեն 6 ամիս է ղեկավարում եք Սյունիքի մարզպետի պաշտոնը: Ինչպիսի՞ Սյունիք եք «ժառանգել» 6 ամիս առաջ:
– Ընդհանուր առմամբ, պետք է ասել, որ վերջին տարիներին մարզում էական ծրագրեր են իրականացվել՝ ինչպես կրթության ոլորտում, այնպես էլ՝ առողջապահության: Բիզնես միջավայրի բարելավման ուղղությամբ եւս էական աշխատանքներ են իրականացվել պետության կողմից: Մենք քաջատեղյակ ենք տարիներ շարունակ բարձրացվող հիմնախնդիրներին ու մեր քայլերը միտված են դրանք աստիճանաբար լուծելուն: Բայց, դեռեւս, հեռու ենք այն մտքից, որ գտել ենք բոլոր լուծումներն ու միջոցները:
– Որո՞նք են մարզի գերակա խնդիրները, որ առաջիկայում կլինեն Ձեր ուշադրության կենտրոնում:
– Առաջիկա տարիներին մեր ուշադրությունը սևեռված է լինելու զբաղվածության հիմնախնդրի մեղմմանը: Փոքր եւ միջին բիզնեսի զարգացմանն ուղղված քայլերն են մեր օրակարգում: Այսօր միջազգային եւ տեղական տարբեր կազմակերպությունների հետ ուսումնասիրություն ենք իրականացնում, ցանկանում ենք բացահայտել մեր մարզի ներուժը: Ճշտում ենք այն ուղղությունները, որտեղ հնարավոր կլինի յուրաքանչյուր սյունեցու համար ստեղծել բարենպաստ միջավայր՝ ձեռնարկատիրությամբ զբաղվելու և եկամուտ ստանալու համար:
Կարդացեք նաև
-Բայց մարզում կա՞ն նման հնարավորություններ:
-Իհարկե, մարզում կան բավականին լավ հնարավորություններ. ե՛ւ աշխարհագրական դիրքը, եւ տարբեր գոտիների նպաստավոր բնակլիմայական պայմանները թույլ են տալիս հատկապես գյուղատնտեսության ոլորտում արդյունավետ ծրագրեր իրականացնել: Արդեն քարտեզագրել ենք եւ հստակ պատկերացումներ ունենք, թե որ տարածաշրջանում գյուղատնտեսության, որ ճյուղի զարգացումը կարող ենք խթանել: Զուգահեռաբար զբաղվում ենք նաև իրացման շուկաներ գտնելով, առանց դրա դժվար է արդյունքներ ակնկալել:
-Այսինքն` մարզում առկա զբաղվածության ներկայիս մտահոգիչ իրավիճակը մտադիր եք բիզնես միջավայրի ստեղծմա՞մբ մեղմել:
– Այո, ամեն ինչ պետք է անենք բիզնես միջավայրը նպաստավոր դարձնելու համար: Մարդիկ իրենց մտավոր ու նյութական կարողությունները ներդնելով պետք է կարողանան հոգալ իրենց ընտանիքների կարիքները:
-Օրինակ ի՞նչ բիզնես կարող են անել Սյունիքում:
-Ցանկացած: Սկսած քարերի վերամշակումից, թեթեւ արդյունաբերությունից, մեխանիկայից մինչև թռչնաբուծություն, անասնապահություն, պտղաբուծություն: Գորիսում ոսկերչության զարգացման հեռանկարներ կան, Մեղրիում պտուղների վերամշակման: Կարելի է երկար թվարկել:
-Պարո՛ն Հակոբյան, տարեվերջին Սյունիքում ներդրումային համաժողով էր կազմակերպվել եւ տարբեր դոնոր կազմակերպություններին էր ներկայացվել մարզի հնարավորությունները: Համաժողովն իր արդյունքը տվե՞ց, արդյոք կա՞ն ցանկություն հայտնողներ, ովքեր մտադրություն ունեն մարզում տարբեր ոլորտներում ներդրում անել:
-Մենք ուզում ենք բոլոր խնդիրները հստակ ամփոփել մեր փաստաթղթի մեջ: Ու արդեն երկրորդ փուլով մեր առաջարկների փաթեթը ներկայացնելու ենք պոտենցիալ ներդրողներին: Կկազմակերպվի հաջորդ հանդիպումը, որտեղ արդեն կքննարկվեն կոնկրետ գործողությունները: Առհասարակ, յուրաքանչյուր ներդրողի համար՝ ռուսաստանաբնակ սյունեցի լինի, թե օտարերկրացի բիզնեսմեն, Սյունիքի դռները բաց են:
-Պարո՛ն Հակոբյան, խոսակցություններ կան, որ Գորիսի պետհամալսարանի կառավարման խորհրդի հաջորդ նախագահը Դուք եք լինելու: Հավաստի՞ են այդ լուրերը, կա՞ն այլ թեկնածուներ:
-Հունվարի 16-ին նիստ է նշանակված, ամսի 16-ին պարզ կլինի:
-Այս տարի Գորիսում քաղաքապետի ընտրություն է լինելու: Լուրեր են շրջանառվում, որ Դուք արդեն ունենք քաղաքապետի Ձեր թեկնածուն: Որքանո՞վ են հավաստի այս տեղեկությունները:
-Համայնքապետի ընտրությունը, որքանով գիտեմ հունիս ամսին է: Մեր կուսակցությունը՝ ՀՀԿ-ն, բնականաբար իր դիրքորոշումը կհայտնի եւ դրա շրջանակներում կսատարենք մեր թեկնածուին:
-Եւ վերջում, եթե ասելիք ունեք կամ ավելացնելու որեւէ բան մեր հարցազրույցի շրջանակներում՝ խնդրեմ:
-Ես կարծում եմ, որ մենք ունենք ամենամեծ պոտենցիալը՝ դա մարդն է: Սյունեցին իր տեսակով, կամային հատկանիշներով, հայացքներով տարբերվել է : Կարծում եմ՝ մեր ժողովրդի հետ միասին կկարողանանք մեր խնդիրներին աստիճանական լուծում տալ: Եւ ամենակարեւորը՝ մարզային իշխանությունը պատրաստ է ծառայելու, լսելու ցանկացած սյունեցու մտահոգությունը՝ դա լինի առաջարկության կամ քննադատության տեսքով: Այդ միջավայրում մենք կփորձենք ավելի լավ աշխատել, նման բարյացակամ հասարակություն ունենալով, տեղական իշխանությունները կկարողանան խնդիրներն ավելի արդյունավետ եւ օպտիմալ լուծել: Բոլորիս հաջողություն եմ մաղթում, թող 2014թ.-ը լինի առաջին հերթին խաղաղության տարի, սիրո, ջերմության եւ աշխատանքի տարի:
Սյունիքի մարզպետ Վահե Հակոբյանի հետ հարցազրույցի շարունակությունը՝ առաջիկա հրապարակումներում:
Մերի ՍՈՂՈՄՈՆՅԱՆ
