Հայտնի է, որ Չինաստանում և Հնդկաստանում ընտրովի աբորտը տարածված է, սակայն սեռերի անհամաչափ ծնելիություն է գրանցվել նաև Հայաստանում և Եվրախորհրդի այլ անդամ երկրներում ևս, այդ թվում՝ Ադրբեջանում, Վրաստանում, Ալբանիայում, և կասկած չկա, որ այդ անհամաչափության պատճառը ընտրովի աբորտն է, «Human Rights Comment» կայքում գրում է Եվրախորհրդի մարդու իրավունքների հանձնակատար Նիլս Մույժնիեկսը՝ նշելով, որ այս խտրականության պատճառը հասարակությունում կնոջ ցածր դիրքն է, ինչի դեմ պետք է ակտիվորեն պայքարել և արգելել օրենքով:
Նորածինների սեռերի նորմալ հարաբերակցությունը համարվում է 102-106 տղա՝ 100 աղջկա դիմաց: Սակայն 2011թ. ըստ ԵԽԽՎ-ի ներկայացրած տվյալների, Հայաստանում, Ադրբեջանում և Ալբանիայում հարաբերակցությունը շեղվել է 112/100, իսկ Վրաստանում՝ 111/100:
Ավելի մտահոգիչ են եղել ՄԱԿ-ի բնակչության հիմնադրամի 2013թ. տվյալները, ըստ որի Հայաստանում հարաբերակցությունը հասել է 114-115/100, իսկ Ադրբեջանում՝ 116/100:
Եվրախորհրդի մարդու իրավունքների և կենսաբժշկության մասին կոնվենցիան արգելում է երեխայի ապագա սեռն ընտրելու միջոցներ ձեռնարկելը, բացառությամբ այն դեպքերի, եթե դա արվում է սեռի հետ կապված լուրջ ժառանգական հիվանդությունից խուսափելու համար: Կոնվենցիային միացել են 47 անդամ երկրներից 29-ը, նրանց մեջ՝ Ալբանիան և Վրաստանը, սակայն չեն միացել Հայաստանն ու Ադրբեջանը:
Կարդացեք նաև
Բացի համապատասխան օրենքներ ընդունելուց, ՄԱԿ-ի մի քանի մարմիններ պետությունների և քաղաքացիական հասարակությունների առաջ պահանջներ են դրել խնդրի լուծման համար, դրանք են՝ հավաստի տվյալների հավաքագրում, առողջապահության նախարարության կողմից խնդրի հետ կապված ուղեցույցների մշակում, կանանց և աղջիկներին աջակցության ցուցաբերում, պետական օրենսդրական բարեփոխումների միջոցով նորածնի սեռի ընտրության արմատական պատճառների վերացում, տղաների և աղջիկների հավասարառության պետական աջակցություն:
Պատրաստեց Հովհաննես ԻՇԽԱՆՅԱՆԸ
