«Փուչիկը փչվել է ֆինանսական շուկայում` ուժեղ դրամի քաղաքականության արդյունքում, որը պայթել է 2009-ի մարտի 3-ին»,-Aravot.am-ի հարցին` Քոչարյան-Սարգսյան հրապարակային բանավեճում հնչած տնտեսագիտական հիմնավորումներից ո՞րն է առավել հիմնավոր և ի վերջո, ե՞րբ է փչվել փուչիկն ու ե՞րբ պայթեցվել, այսպես պատասխանեց «Պոլիտէկոնոմիա» հետազոտական ինստիտուտի տնօրեն Անդրանիկ Թևանյանը:
Տնտեսագետը հավելեց. «Փուչիկը փչվել է այսօրվա իշխանության օրոք, որն ապահովում է տնտեսական անկում, հազարավոր մարդկանց արտագաղթ և աղքատության աճ»:
Ըստ Անդրանիկ Թևանյանի` փաստարկված են Ռոբերտ Քոչարյանի հիմնավորումները. «Տիգրան Սարգսյանը, քանի որ ձախողել է բոլոր ոլորտներում, փորձում է այդ ձախողումներն արդարացնել ստացած վատ ժառանգությամբ, և բնական էր Քոչարյանի արձագանքը: Բայց բանավեճ`որպես այդպիսին չտեսա, քանի որ Տիգրան Սարգսյանը ոչինչ չունի իր վարչապետության ժամանակահատվածի համար ներկայացնելու, իսկ Ռոբերտ Քոչարյանն ունի: Փաստարկված են Քոչարյանի գնահատականները, իսկ այն, ինչ ներկայացնում է Տիգրան Սարգսյանը` որպես հիմնավորում, դրանք են իսկական փուչիկները»:
Ըստ տնտեսագետի` Տիգրան Սարգսյանը փորձում է «բանավեճը տեղափոխել նախորդ իշխանության ժամանակահատված, քանի որ դա նրա միակ փրկությունն է»:
Կարդացեք նաև
Անդրադառնալով նախկինում վարվող տնտեսական քաղաքականությանը` Անդրանիկ Թևանյանն ասաց. «Նախորդ իշխանության օրոք ամենագլխավոր խնդիրը ուժեղ դրամի քաղաքականությունն էր, երբ դոլար–դրամ փոխարժեքային քաղաքականությունը կրկնակի ուժեղացրեց դրամը` մեկ դոլարի արժեքը 580-ից դարձավ 300 դրամ: Սա հարվածեց տեղական արտադրանքի արտադրությանը և ներմուծմանը: Քոչարյանի սխալն այն էր, որ նա չազդեց ԿԲ-ի այդ քաղաքականության վրա, երկրորդ անգամ Տիգրան Սարգսյանին առաջարկեց ԿԲ նախագահ»:
Ըստ Անդրանիկ Թևանյանի` «եթե փուչիկ փչվել է, փչվել է ուժեղ դրամի քաղաքականության հետևանքով»:
Տնտեսագետը շեշտեց. «Իսկ շինարարական փուչիկ հասկացություն գոյություն չունի: Փուչիկները` որպես կանոն լինում են ֆինանսական բնույթի, որոնք անվանում են ֆինանսական բուրգեր: Ուժեղ դրամի քաղաքականությունը մի փուչիկ էր, որը պայթեց 2009-ի մարտի 3-ին, երբ մեկ գիշերվա մեջ որոշում կայացվեց, որ դրամը պիտի թողեն, որ լողացող կուրսով լինի, իսկ դրանից առաջ ծախսեցին պահուստային 700 միլիոն դրամը»:
Մեր հստակեցմանը` տնտեսագետը Տիգրան Սարգսյանի` Ռոբերտ Քոչարյանի դաշտ նետած փուչիկը կրկին տեղափոխում է ՀՀ վարչապետ դա՞շտ, Անդրանիկ Թևանյանն այսպես արձագանքեց. «Տիգրան Սարգսյանը Խաչիկ գյուղի կլուբի պահակը չի եղել չէ՞ նախորդ իշխանության օրոք: Նա եղել է ԿԲ նախագահը: Մենք` փորձագետներս, 2000-ի կեսերին նրա վարած քաղաքականությանը ընդդիմանում էինք, բայց մեր գնահատականները մերժվում էին, կուռք էին սարքել ուժեղ դրամի քաղաքականությունը: Ուստի, այնպես չէ, որ հանկարծ բոլորը արթնացել են, շինարարական փուչիկ տեսել»:
Տնտեսագետ Թաթուլ Մանասերյանը համարում է, որ Քոչարյան-Սարգսյան բանավեճը անձնային բնույթի է: Ուստի չցանկացավ տնտեսագիտական մեկնաբանություններ անել: Միայն փոխանցեց. «Անձանց խոսակցությունները ինձ բնավ չեն հետաքրքրում: Ես քաղաքականությունից զզվում եմ, հատկապես այսօրվա քաղաքականությունից: Ինձ ոչինչ չի պատճառում դրանց մեկնաբանությունը. մեկը մի բան է ասել, մյուսն էլ` պատասխանել: Ես ինձ այդ հարցում երրորդ կողմ դասել չեմ կարող: Ես կարող եմ իրավիճակի մեկնաբանություն տալ»:
Տաթև ՀԱՐՈՒԹՅՈՒՆՅԱՆ
