Վաղը Uptown պանդոկում #UPkino ծրագրի շրջանակներում կցուցադրվի Ֆ. Մ. Մուռնաուի «Նոսֆերատու, Սարսափի համանվագ» համր ֆիլմը: Այն նկարահանվել է 1922թ-ին և հանդիսանում է Բրեմ Սթոքերի «Դրակուլա» վեպի առաջին էկրանավորումը: Գլխավոր դերերում հանդես են գալիս Մաքս Շրեկն ու Գրետա Շրյոդերը: #UPkino ծրագրի համադրող եւ նախաձեռնության հեղինակ կինոքննադատ Րաֆֆի Մովսիսյանը Aravot.am-ի հետ զրույցում կարծիք հայտնեց, որ ֆիլմը մինչ օրս չի կորցրել իր դիտարժանությունը և կիրառված ռեժիսորական հնարքներից շատերը մեկնարկ են հանդիսացել հորորի և սարսափի ժանրերի համար: «Նոսֆերատու, Սարսափի համանվագ» ֆիլմը համաշխարհային կինոյի անհերքելի արժեքներից է և հանդիսանում է գրականություն-կինո փոխհարաբերման լավագույն նմուշներից մեկը, որտեղ կինոն հավասարը հավասարին է գրական հիմքի հետ: #UPkino-ի շրջանակներում «Նոսֆերատու, Սարսափի համանվագ» ֆիլմի ցուցադրությունը կուղեկցվի Դավիթ Ստեփանյանի՝ հատուկ ֆիլմի համար մշակված էլեկտրոնային երաժշտությամբ: Այս ցուցադրության ժամանակ փորձ է արվելու համադրել երկու դարաշրջանների մշակութային միմյանց ուղղակի չառնչվող խորհրդանիշներ՝ համր կինոն և էլեկտրոնային երաժշտությունը»,-հայտնեց կինոքննադատը:
Նաեւ ասաց, որ ծրագիրը շարունակական է լինելու և համր կինոյի լավագույն նմուշները #UPkino-ի շրջանակներում կցուցադրվեն տարբեր DJ-երի երաժշտության ուղեկցությամբ:
Գոհար ՀԱԿՈԲՅԱՆ
