«Հայաստանի Հանրապետությունը մայիսի 1-ից սկսած իր սուվերենությունը` տնտեսական քաղաքականության, հանձնելու է փլուզվող, փտած, արդեն վրան դիակային բծեր առաջացած մի պետության` Ռուսաստանի Դաշնությանը: Հետո ի՞նչ է լինելու: Ներկայիս Հայաստանի Հանրապետության ղեկավարությունը երաշխիքներ կարո՞ղ է տալ Ռուսաստանի Դաշնության հետագա ճակատագրի վերաբերյալ` 30 տարվա կտրվածքով: Սրանից 25 տարի առաջ էլ տեսանք` ինչ եղավ, երաշխավորում էին ավանդները, հետո ինչ, հիմա էլ են երաշխավորում»,-այսօր «Հենարան» ակումբում պարտադիր կուտակային կենսաթոշակային համակարգի վերաբերյալ նման կարծիք հայտնեց քաղաքագետ Ռուբեն Մեհրաբյանը:
Քաղաքագետի խոսքերով` «Ես կարծում եմ այստեղ գործ ունենք մի երեւույթի հետ, որի աբսուրդի չափաբաժինը մեր ներքին քաղաքականության մեջ անցել է կրիտիկական բոլոր սահմանները»: Պարոն Մեհրաբյանը կարծում է, որ գարնանն ընդառաջ մեր երկրում քաղաքացիական զարթոնք կլինի, որի հիմքը «Ընդդեմ պարտադիր կուտակային կենսաթոշակային համակարգի» քաղաքացիական նախաձեռնությունն է:
Նելլի ԲԱԲԱՅԱՆ
