Դեռևս ամռանը Շիրակի մարզի երկրորդ քաղաքում` Արթիկում, ակտիվ խոսակցություններ էին պտտվում այն մասին, որ իրենց պատգամավորը` ԲՀԿ-ական Մուշեղ Պետոյանը, մտադիր է վաճառել իր իսկ քաղաքում ունեցած բիզնեսը` քարհանքները, գազալցակայանները ու ընդմիշտ տեղափոխվել Ռուսաստան: Այն ժամանակ պատգամավորը Aravot.am-ի հետ զրույցում ասել էր, որ իր ընտանիքը հայրենիքում իրեն շատ լավ է զգում, իրենց բիզնեսը բարգավաճում է, հետևաբար և իրենք բողոքելու առիթ չունեն և տեղափոխվելու կարիք չեն զգում: Պատգամավորը նաև ազնվորեն խոստովանել էր, որ իր եղբայրը Անապա է գնում-գալիս և տեղափոխվելու մտադրություն ունի:
«Եթե ճիշտն ասեմ եղբայրս Անապա է գնում-գալիս, ինչ-որ մտադրություններ ունի, բաց ես նոր եմ ընտրվել, նոր մի տարին լրացավ, ինչպե՞ս կթողնեմ ու կգնամ, կամ ինչո՞ւ: Վերջը սա մեր երկիրն է, մեր հայրենիքը, մեր երեխաների ապագան այստեղ է, եթե բոլորս թողնենք ու գնանք, վերջը ի՞նչ կլինի»,- ամիսներ առաջ ասել էր Մուշեղ Պետոյանը:
Օրերս Aravot.am-ին հայտնի դարձավ, որ պատգամավորը իր ընտանիքով մեկնել է Անապա: Արթիկցիների ասելով, նա այնտեղ զբաղվում է կամ շինանյութերի բիզնեսով, կամ էլ ռեստորան է աշխատեցնում: Վերջիններիս բնութագրելով, Մուշեղ Պետոյանի մի ոտքը այստեղ է, մի ոտքը` դրսում:
Մենք փորձեցինք այս խոսակցությունները ճշտել հենց Մուշեղ Պետոյանից, սակայն նրա հեռախոսահամարները անհասանելի էին: Ի նկատի ունենալով, որ Մուշեղ Պետոյանը իր թիմով աջակցել էր ՀՀԿ-ական Արսեն Աբրահամյանին Արթիկի քաղաքապետ ընտրվելու հարցում, նրա հայրն էլ` Թուրինջ Պետոյանը, Արթիկի ավագանու անդամ է, զանգահարեցինքն Արթիկի քաղաքապետին` հետաքրքրվելով, թե որքանո՞վ են իրական պատգամավորի` ընդմիշտ Անապա տեղափոխվելու մասին խոսակցությունները: Արթիկի քաղաքապետն ասաց, որ նրանց հետ մշտական շփման մեջ է և հավաստիացրեց, որ պատգամավորը ժամանակավորապես է բացակայում երկրից: Իսկ Անապայում բիզնեսով զբաղվելու մասին խորհուրդ տվեց հարցնել անձամբ պատգամավորից:
Կարդացեք նաև
Նկատենք, սակայն, որ ԱԺ պատգամավորները արձակուրդում չեն, ակտիվ աշխատանքի մեջ են, ճիշտ է` դեռ ԱԺ նիստեր չեն գումարվում, սակայն վերջիններս մասնակցում են օրենքների մշակմանը, ստեղծված հանձնաժողովների աշխատանքներին: Ի դեպ, ԲՀԿ-ական պատգամավորը գյուղատնտեսական և բնապահպանական հարցերի մշտական հանձնաժողովի անդամ է:
Եվ վերջապես նա բավական դաժան պայքար մղեց թիվ 36 ընտրատարածքում, մեծամասնական կարգով կարողացավ հաղթել այն ժամանակվա Արթիկի քաղաքապետի եղբորը` 10 տարվա պատգամավոր, ՀՀԿ-ական Մխիթար Վարագյանին, ինչպես նաև Արթիկի ոստիկանապետի եղբորը`ՕԵԿ-ական Հունան Պետրոսյանին: Ու այս ամենից հետո զարմանալի է, որ պատգամավորը հեռանալու կամ էլ հեռակա կարգով հայրենիքում ԱԺ-ում պատգամավոր աշխատելու մասին է մտածում: Թեև այս ամենը կփորձենք ճշտել պատգամավորի վերադառնալուն պես:
Նունե ԱՐԵՎՇԱՏՅԱՆ
