Լոռու մարզի ընդհանուր իրավասության դատարանը, դատավոր Սուրեն Բաղդասարյանի նախագահությամբ, կարճել է կրոնական համոզմունքների պատճառաբանությամբ ժամկետային զինվորական կամ այլընտրանքային ծառայությունից հրաժարվելու մեջ մեղադրվող Էդմոնդ Փեթակչյանի նկատմամբ հարուցված քրեական գործը:
Դատարանը նաեւ դադարեցրել է նրա նկատմամբ քրեական հետապնդումը` վերացնելով որպես խափանման միջոց ընտրված ստորագրություն չհեռանալու մասին:
Համաձայն մեղադրական եզրակացության` Էդմոնդ Փեթակչյանը կրոնական համոզմունքների պատճառաբանությամբ հրաժարվել էր զինվորական ծառայությունից` այդկերպ խուսափելով ժամկետային զինվորական կամ այլընտրանքային ծառայության հերթական՝ 2012 թվականի գարնանային զորակոչից` չունենալով ազատվելու օրինական հիմքեր:
Դատարանը պարզել է, որ ամբաստանյալ Էդմոնդ Փեթակչյանը մինչև 2013 թվականի օգոստոսի 1-ը դիմում է ներկայացրել այլընտրանքային աշխատանքային ծառայության անցնելու մասին, որի հիման վրա «Այլընտրանքային ծառայության» հարցերով հանրապետական հանձնաժողովը 2013 թվականի հոկտեմբերի 23-ին որոշում է կայացրել նրան «Գյումրու տուն-ինտերնատ» ՊՈԱԿ-ում որպես խնամող սանիտար այլընտրանքային աշխատանքային ծառայության անցնելու մասին:
Կարդացեք նաև
Իսկ ՀՀ քրեական օրենսգիրքը գործողության մեջ դնելու մասին ՀՀ օրենքում լրացումներ կատարելու մասին օրենքի 1-ին հոդվածի համաձայն` կարճվում է դատարանների, նախաքննության և հետաքննության մարմինների վարույթում գտնվող քրեական գործերը և դադարեցվում քրեական հետապնդումն այն անձանց նկատմամբ, որոնք կասկածվում կամ մեղադրվում են Հայաստանի Հանրապետության քրեական օրենսգրքի 327-րդ, 327.1-ին, 327.2-րդ, 327.3-րդ և 327.4-րդ հոդվածներով նախատեսված արարքների կատարման համար, եթե այդ անձինք մինչև 2013 թվականի օգոստոսի 1-ը դիմում են ներկայացրել այլընտրանքային ծառայություն անցնելու վերաբերյալ, և «Այլընտրանքային ծառայության մասին» Հայաստանի Հանրապետության օրենքով սահմանված կարգով լիազորված մարմինը որոշում է կայացրել նրանց այլընտրանքային ծառայության ուղարկելու մասին:
ՀՀ քրեական դատավարության օրենսգրքի 35-րդ հոդվածի 1-ին մասի 12-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե`անձը Հայաստանի Հանրապետության քրեական օրենսգրքի ընդհանուր մասի դրույթների ուժով ենթակա է ազատման քրեական պատասխանատվությունից:
Անուշ ԲՈՒԼՂԱԴԱՐՅԱՆ
