«Երբ Րաֆֆի Հովհաննիսյանը մանդատը վայր դրեց, արդեն խմբակցությունում հավասարակշռությունը խախտվեց: Այսինքն` այս իրավիճակը զարմանալի չէ»,-Aravot.am-ի հետ զրույցում մեկնաբանելով «Ժառանգություն» խմբակցության ներսում գոյություն ունեցող իրավիճակը, երբ «Ժառանգություն» խմբակցությունում «Ժառանգությունը» փոքրամասնություն է, այսպես արտահայտվեց «Ժառանգություն» կուսակցության վարչության նախկին քարտուղար, հրապարակախոս Կարինե Հակոբյանը:
Մեր այն հստակեցմանը, թե «Ժառանգության» ներսում ստեղծված իրավիճակի գլխավոր մեղավորը Րաֆֆի Հովհաննիսյա՞նն է, տիկին Հակոբյանն այսպես արձագանքեց. «Մանդատի վայր դնելը վերաբերմունք էր հասարակության քվեի նկատմամբ: Արդեն ամեն ինչ պարզ էր, և ոչ մի զարմանալու բան չկար: Մյուսները հետևանք են և մանր հարցեր: «Ժառանգությունը» միշտ Րաֆֆի Հովհաննիսյանի անվան հետ է կապվել, և խմբակցության նախկին պատգամավորները շատ լավ են աշխատել, ու ձևավորվել էր «Ժառանգության» կերպար, որը վերացավ: Այժմ այն, ինչ տեղի է ունենում, բնական հետևանք է: Ուրիշ բան չէր կարող տեղի ունենալ: Րաֆֆի Հովհաննիսյանը, երբ դուրս եկավ, էլ ի՞նչ կարող էր տեղի ունենալ»:
Տիկին Հակոբյանը ցանկանում է խորհրդարանում տեսնել Ստեփան Սաֆարյանին, քանի որ նրա «կերպարը ներդաշնակ է «Ժառանգությանը»:
«Ժառանգություն» խմբակցության նախկին պատգամավոր, աստվածաբան Վարդան Խաչատրյանը համարում է, որ «այն, որ «Ժառանգությունը» փոքրամասնություն է սեփական խմբակցության մեջ՝ բազմաթիվ սուբյեկտիվ պատճառների հետևանք է» ու նկատում. «Հիմնական թիրախը եղել է այն, որ խորհրդարանական ընտրություններում կուսակցության սոցիալական բազայի մաքսիմալ ընդլայնում իրականացվեր`ներառել հ/կ-ների սեկտոր, դաշնակից կուսակցություններ և այլն: Դրան միտված քաղաքականության արդյունքում տեսնում ենք այն, ինչ ունենք»:
Կարդացեք նաև
Պարոն Խաչատրյանից հետաքրքրվեցինք` Րաֆֆի Հովհաննիսյանի` մանդատը վայր դնելու քայլը պատճառներից չէ՞ խմբակցության այս ճգնաժամային իրավիճակի համար: Պարոն Խաչատրյանը պատասխանեց. «Րաֆֆի Հովհաննիսյանը գնում էր նախագահական ընտրությունների, և որպես պատգամավոր գնալը նա գերադասեց սոցիալական բազայի ընդլայնմամբ` հ/կ-ների սատարման տեսակետից: Դա մեկ միասնական գործընթաց էր` միտված «Ժառանգության» մաքսիմալ բարձր կարգավիճակ ստանալուն, կուսակցության հասարակական համալրմանը»:
Հարցին` հնարավոր համարո՞ւմ է, որ Ստեփան Սաֆարյանը կրկին հայտնվի խորհրդարանում, պարոն Խաչատրյանն այսպես պատասխանեց. «Ստեղծված քաղաքական իրավիճակում դժվար եմ պատկերացնում, որ ռադիկալ անցումներ տեղի ունենան, որ ինչ-որ մարդիկ ցած դնեն մանդատները`«Ժառանգության» մեծամասնությունը պահպանելու համար: Դա քիչ հավանական եմ համարում»:
Տաթև ՀԱՐՈՒԹՅՈՒՆՅԱՆ
