Մադրիդ քաղաքի Պոլիտեխնիկական համալսարանի իսպանացի գիտնականները մշակել են նոր համակարգ, որը թույլ է տալիս վերահսկել սթրեսի աստիճանը մարդկանց մոտ եւ կանխել այն. ըստ RBK.ru-ի, հաղորդում են տեղական ԶԼՄ-ները:
Սարքը արդյունքների մասին իրական ժամանակում տեղեկացնում է սեփականատիրոջը: Նշվում է, որ համակարգն իր մեջ ներառում է սարքային ապահովում, որն արձանագրում է ֆիզիոլոգիական ազդակները (զարկերակը եւ մաշկի ջերմաստիճանը), ինչպես նաեւ ծրագրային ապահովում, որն իրական ժամանակահատվածում վերլուծում է այդ ազդակները եւ թույլ է տալիս իմանալ մարդու տրամադրության մասին:
Գիտնականների կարծիքով՝ սարքի կիրառման շրջանակը լայն է, սակայն այն հիմնականում կաշխատի ճանապարհային երթեւեկության անվտանգության ապահովման բնագավառում: Այսպիսով` նոր համակարգը թույլ կտա պարզել ինչպես պահը, երբ վարորդը պատրաստ է քնել ղեկի առջեւ, այնպես էլ սթրեսային վիճակը, որը վարելու ոճը դարձնում է ավելի ագրեսիվ, հետեւաբար՝ վտանգավոր:
Բացառված չէ, որ սարքը նաեւ տարածում կգտնի գրասենյակային աշխատողների եւ մարդկանց հետ աշխատող մասնագետների մոտ:
