Համակարգչի ստեղծման ուղղությամբ աշխատանքներն իրականցվում են 79,7 միլիոն դոլար արժողությամբ «Դժվար թիրախների ներթափանցում» ծրագրի շրջանակներում:
Ըստ «Ամերիկայի Ձայն»– ի, Միացյալ Նահանգների անվտանգության ազգային գործակալությունը մշակում է համակարգիչ, որը կկարողանա «կոտրել» ծածկագրում իրականացնող համակարգչային ծրագրերի մեծ մասը՝ անկախ այն բանից, արդյոք դրանք օգտագործվում են այլ պետությունների պետական գաղտնիքները, թե՝ անհատական բանկային հաշիվները պաշտպանելու համար:
Այս մասին տեղեկացրել է «Վաշինգտոն Փոստ» ամերիկյան պարբերականը՝ նշելով, որ հաղորդագրության համար հիմք են ծառայել ԱՄՆ-ի ԱԱԳ-ի պայմանագրային նախկին ծառայող Էդվարդ Սնոուդենի կողմից հրապարակված նյութերը:
«Վաշինգտոն Փոստ»-ի համաձայն, Անվտանգության ազգային գործակալությունն աշխատում է այսպես կոչված «քվանտային համակարգչի» մշակման ուղղությամբ, որը հնարավորություն կընձեռի գործակալությանը «կոտրել» զգայուն տեղեկությունները պաշտպանող ծածկագրերը:
Կարդացեք նաև
Ըստ պարբերականի, նման համակարգիչը կկարողանա միաժամանակ կատարել բազմաթիվ հաշվարկներ, սակայն դրա մշակման համար կպահանջվի առնվազն մի քանի տարի: Քվանտային համակարգիչը, բացի ծածկագրերը շրջանցելու, հնարավոր կլինի օգտագործել նաև բժշկության բնագավառում:
«Վաշինգտոն Փոստ»-ի համաձայն, համակարգչի ստեղծման ուղղությամբ աշխատանքներն իրականցվում են 79,7 միլիոն դոլար արժողությամբ «Դժվար թիրախների ներթափանցում» ծրագրի շրջանակներում:
Քվանտային համակարգչի մշակման ուղղությամբ աշխատում են նաև պետական կազմակերպությունների կազմում չաշխատող գիտնականները, սակայն դեռևս պարզ չէ, թե արդյոք ԱՄՆ-ի ԱԱԳ-ի կողմից իրականացվող հետազոտական աշխատանքներն առաջ են անցել այլ հետազոտողների կողմից իրականացվող հետազոտություններից:
Արմեն Հովհաննիսյան
