Բելգիացի մոդելավորող Սթիվ Հելսենը Նոր տարվա գիշերն ընկել է Բրյուսելի «Ռոյալ Վինձոր» հյուրանոցի պատշգամբից: Նա գտնվում է ծայրահեղ ծանր վիճակում: Այս մասին հաղորդում է ИТАР-ТАСС-ը՝ հղում անելով տեղական ԶԼՄ-երին:
Նրանց տվյալներով, Հելսենն ընկել է «Ռոյալ Վինձոր» հյուրանոցի պատշգամբից: Ընկնելու արդյունքում նա ստացել է մի քանի կոտրվածքներ: Ականատեսների խոսքերով՝ Հելսենը ընկնելիս կոտրել է հյուրանոցի մուտքի վերեւի ապակե տանիքը, իսկ հետո ընկել է մոտակայքում կայանված մեքենայի տանիքին: Թե որ հարկից է նա ընկել՝ չի հաղորդվում:
ԶԼՄ-ների տվյալներով՝ 2013 թվականին մոդելավորողը, որի կազմակերպությունը բախվել է ֆինանսական խնդիրների, տարել է հոգեբանական սթրես եւ ստիպված է եղել օգնության համար դիմել բժիշկներին: Մի քանի ամիս անց, իր հարցազրույցներից մեկում, Հելսենը հայտարարել էր, որ ավելի հանգիստ է դարձել:
Հելսենը «սարդ-մարդ»-ի կոստյումի հեղինակն է: Այդ կոստյումով դերասան Թոբի Մագուայրը խաղացել է ֆիլմում: Մոդելավորողը նաեւ պատրաստել է համազգեստներ բելգիացի մարզիկների համար, որոնք հանդես էին գալիս միջազգային առաջնություններում:
