Ի տարբերություն նախորդ տարիների, այս տարի Գյումրու կենտրոնական փողոցները Ամանորի կապակցությամբ լուսավորվել են` քաղաքին որոշակիորեն տոնական տեսք հաղորդելով: Իհարկե, խոսքը միայն Գյումրու կենտրոնական հատվածին է վերաբերում, երկրորդական փողոցներում նույն մութ ու խուլ վիճակն է: Այս ամենը քաղաքապետարանի վրա նստել է 16 միլիոն դրամ: Գյումրեցիներից ոմանք պնդում են, որ այդ գումարով կարելի էր մի քանի անօթևան ընտանիքի Ամանորը կազմակերպել, միգուցե և նրանք ճիշտ են, սակայն պատասխանատուներն էլ իրենց հերթին նկատում են,որ գյումրեցիների, առավել ևս մանուկների ուրախությունը ավելին արժե, քան 16 միլիոն դրամն է:
Նկատենք, որ Ամանորի կապակցությամբ իրենց տարածքը լավագույնս զարդարած 7 կազմակերպությունների մեծ մասը, պարգևատրվելով Գյումրու քաղաքապետարանի կողմից, իրենց գումարը` 50 հազարական դրամ, հանձնեցին մանկատներին ու անօթևան գյումրեցիներին:
Գյումրեցիներից շատերի կարծիքով, ամենաաօրիգինալը զարդարված է «Իսուզ» կամ վերջերս անվանափոխված «Նանէ» հյուրանոցի տարածքը, համենայնդեպս այս վայրը գիշերվա ուշ ժամերին ու Գյումրու անդիմադրելի սառնամանիքին այցելուների պակաս չունի: Ձմեռ պապերը աշխատում են հենց այս տարածքում` տոնածառի տակ, ընդ որում միանգամից մի քանի հոգի:
Այս տարի մի չքնաղ տոնածառ էլ ավելացել է Գյումրու Բոշի սադում: Գյումրու ավագանու անդամ Լևոն Բարսեղյանը, ֆեյսբուքյան իր էջում տեղադրելով այս տոնածառի նկարը, գրել է. «Գյումրվա գեղեցկուհին, ո՞վ ունի»:
Կարդացեք նաև
Նունե ԱՐԵՎՇԱՏՅԱՆ
