Հայաստանի նախկին արտգործնախարար, ԱԺ «Բարգավաճ Հայաստան» խմբակցության անդամ Վարդան Օսկանյանն արձագանքել է վարչապետ Տիգրան Սարգսյանի՝ դեկտեմբերի 27-ի ասուլիսին հնչեցրած մտքին:
«Տիգրան Սարգսյանն այսօրվա ասուլիսին իր օֆշորային սկանդալի մեջ փորձել է ներքաշել ինձ: Ասեմ, որ որքան Հայաստանի տնտեսությանը վերաբերող նրա ասածներն են համընկնում իրականությանը, նույնքան ես եմ ներգրավված օֆշորային սկանդալում: Հանրությունը, այնուամենայնիվ, հենց Տիգրան Սարգսյանի բացատրությանն է սպասում օֆշորի թեմայով»,- Ֆեյսբուքի իր էջում գրել է Օսկանյանը:
Հիշեցնենք, որ այսօր մամլո ասուլիսում լրատվամիջոցի հարցին, թե վերջերս մամուլում կրկին անդրադարձ է եղել օֆշորային սկանդալում ներգրավված մի սփուռքահայ կնոջ գործունեությանը, որ ոմն Նաիրի Մեհրեջը ԲՀԿ խմբակցության պատգամավոր Վարդան Օսկանյանի բարեկամուհին է, ինչպես նաեւ Կիպրոսում բացել է «Մկների ժողով» կազմակերպությունը, որում ընդգրկել է մահացած մարդկանց, վարչապետը պատասխանել էր. «Այդ կինը, որը Կիպրոսում իմ անունով ձեռնարկություն է գրանցել, հենց այդ նույն կինը Կիպրոսում ձեռնարկություն է գրանցել նաև մահացած մարդկանց անունով: Ինձ համար հետաքրքիր է, թե պարոն Օսկանյանն ի՞նչ բացատրություններ կտա` արդյո՞ք սա նրա համար նույնպես անսպասելի տեղեկատվություն է, թե՞ իր անձն է կանգնած սրա հետևում, ու այս սկանդալն ունի քաղաքական ենթատեքստ»:
