Հայ-թուրքական հարաբերությունների վերականգնման գործում առանցքային գործիչ համարվող Սամսոն Օզարաթը հայտնել է, որ Թուրքիայի արտաքին գործերի նախարար Ահմեդ Դավութօղլուի հայտարարությունը, որ 1915թ. հայերի տեղահանումն անմարդկային էր, շատ կարևոր է: Փոխանցում է «Հուրիեթ» թերթը:
«Գուցե այսօր այդ խոսքերը լսելը նորմալ է: Ես մեր անձնական զրույցներից ծանոթ էի Դավութօղլուի տեսակետին` կապված 1915թ.-ի հետ: Ամեն դեպքում, մինչև հիմա մենք երբեք նման խոսքեր չէինք լսել պաշտոնյայից: Այն փաստը, որ նա այս հայտարարությունն արել է որպես Թուրքիայի արտգործնախարար հսկայական քայլ է: Հիմա այն պատմության մի մասն է», – ասել է Օզարաթը, սակայն նշել, որ
Անկարայի քաղաքականության պատճառով հայ-թուրքական արձանագրությունների տապալումից հետո Հայաստանը կորցրել է Թուրքիայի նկատմամբ վստահությունը:
«Նախկինում ազգայնական հռետորաբանությունն էր պատնեշը: Այժմ տնտեսական և դիվանագիտական հավասարակշռությունն է: Ադրբեջանը Թուրքիայի էներգակիրների հիմնական աղբյուրներից է: Բացի այդ, Թուրքիան պետք է հաշվի առնի թուրք գործարարների շահերը, որոնք ներդրում են անում Ադրբեջանում: Սա է պատճառը, թե ինչու վարչապետ Էրդողանը, 2009թ. մայիսի 13 ելույթ ունենալով Ադրբեջանի խորհրդարանում. փոխեց Թուրքիայի քաղաքականության ուղղությունը:
Կարդացեք նաև
Այդ օրվանից հետո Թուրքիայի նկատմամբ Հայաստանի վստահությունը կոտրվել է: Անկեղծ ասած, Դավութօղլուի այցից առաջ Հայաստանում ես չէի կարողանում գտնել գեթ մեկ հոգու, ով կցանկանար նոր բանակցություններ սկսել: Ոչ մեկը չկար: Ո’չ իշխանական, ո’չ ընդդիմադիր կուսակցություններից: Վստահությունը վերացել է», – ասել է Սևծովյան տնտեսական համագործակցության կազմակերպության Թուրքիայում Հայաստանի ներկայացուցիչը, որի ձեռքից Թուրքիայի կառավարությունը վերցրել է թուրքական քաղաքացիությունը, ինչի առիթով նա ասում է, որ իր երազանքն է Հայաստանի և Թուրքիայի քաղաքացիություն ստանալ երկրների հաշտությունից հետո, թեև դա ֆանտազիայի ժանրից է համարում:
Պատրաստեց Հովհաննես ԻՇԽԱՆՅԱՆԸ
