«Կարծում եմ՝ այս տարվա ամենակարեւոր թեման քաղաքական ընտրություններն էին, նախագահական ընտրությունները եւս մի առումով աչքի ընկավ, որովհետեւ միջազգային հանրությունը աչք փակեց խայտառակ կեղծիքներին»,- դեկտեմբերի 27-ին տարեվերջյան ասուլիսի ժամանակ տարին ամփոփեց «Ժառանգություն» կուսակցության վարչության փոխնախագահ Արմեն Մարտիրոսյանը:
Նրա կարծիքով՝ ներքաղաքական երկրորդ կարեւոր գործընթացը Երեւան քաղաքի քաղաքապետի ընտրություններն էին, որի ընթացքում ժողովուրդը հիասթափություն էր ապրում, իսկ իշխանությունները չէին խնայել ընտրակաշառքները:
Պարոն Մարտիրոսյանը կարծում է, որ Հայաստանի իշխանություններն որոշում են կայացրել մտնել Մաքսային միություն միայն իրենց իշխանությունը երկարաձգելու համար.
«Նազարբաեւի եւ Լուկաշենկոյի հայտարարություններից հետո ակնհայտ է, որ Հայաստանի ձայնը այնտեղ լսելի չի լինելու. Հայաստանը ոչ թե կրտսեր եղբոր կարգավիճակում է լինելու, այլ, չեմ ուզում այդ ստորացված անդամի կարագավիճակով բառն օգտագործել, բայց ըստ էության այդպես է լինելու»:
Կարդացեք նաև
Ամի Չիչակյան
