Մոսկվայում բնակվող, կլառնետահար Սեդրակ Հովհաննիսյանի հայցն ու վերաքննիչ բողոքը մերժվել են Կենտրոն եւ Նորք -Մարաշ վարչական շրջանների ընդհանուր իրավասության դատարանում:
Նա դատի էր տվել երգահան Հասմիկ Մանասերյանին, նրա որդուն, ով մեր լրատվամիջոցում հանդես էր եկել մոր ստեղծագործությունների եւ առհասարակ, նրա հեղինակային իրավունքների պաշտպանության հարցով: Երրորդ անձ էր ճանաչվել նաեւ «Առավոտ օրաթերթ» ՍՊ ընկերությունը:
Այսօր ստացել ենք հայցվորի վճռաբեկ բողոքը տաս համակարգչային էջից բաղկացած:
Հայցվորը վիճարկում է ՀՀ քաղաքացիական վերաքննիչ դատարանի նոյեմբերի 23-ի վճիռը, գտնում է, որ դատական ակտով խախտվել են իր նյութական եւ դատավարական իրավունքի նորմերը:
Կարդացեք նաև
Պատվի, արժանապատվության եւ գործարար համբավին պատճառված վնասի հատուցման մասին բողոքում հայցվորը հայտնում է, որ ինքը կենսաթոշակառու է, եւ դատարանն իրեն պետտուրքից չի ազատել:Պետտուրքի գումարը կազմել էր երեսուն հազար ՀՀ դրամ:
Կենսաթոշակառու հայցվորի համար դատարանը մինչ այդ որոշում էր կայացրել, որ պետտուրքից նա կազատվի վճռով եւ մարտի որոշմամբ հետաձգել էր նրա վճարումը:
Սեդրակ Հովհաննիսյանն իր բողոքում հայտնում է, որ դատարանն իր վերաբերյալ «փաստացի վիրավորանք եւ զրպարտություն հանդիսացող տվյալները» չի գնահատել, եւ մերժել է իր հայցը:
Ըստ բողոքաբերի դատարանը խախտել է մարդու իրավունքների եւ հիմնարար ազատությունների մասին Եվրոպական կոնվեկցիայի վեցերորդ հոդվածի պահանջները, «սխալ է մեկնաբանել» քաղաքացիական օրենսգրքի 1087.1 հոդվածը:
Սեդրակ Հովհաննիսյանի բնորոշմամբ, վերաքննիչ դատարանը կրկնել է ստորադաս դատարանի կողմից թույլ տրված խախտումները, «միակողմանի մեկնաբանելով հօգուտ պատասխանողների»:
Նա խնդրում է բեկանել դատական ակտը, այն ուղարկել նոր դատարան նոր կազմով քննելու, եւ իր բողոքն ընդունել վարույթ:
Ուշադրության արժանի է այն, որ պահանջում կա այսպիսի ձեւակերպում.«Ուղարկել նոր քննության` սահմանելով նոր քննության ծավալը»:
Ռուզան ՄԻՆԱՍՅԱՆ
