ՀՀ գլխավոր դատախազը ընթացք է տվել փաստաբանի դիմումին
Լոռու մարզի դատախազության ավագ դատախազ Սոս Տոնոյանը որոշում է կայացրել վանաձորցի Ռոբերտ Հովհաննիսյանի նկատմամբ ընտրված խափանման միջոց կալանավորումը վերացնելու մասին:
Վանաձորցու փաստաբան, ՀՀ փաստաբանների պալատի անդամ Ռուբեն Հակոբյանը բողոք էր ներկայացրել Լոռու մարզի դատախազ Գրիգոր Էլիզբարյանին` պահանջելով վերացնել ՀՀ ոստիկանության ՔԳՎ Լոռու մարզի քննչական բաժնի Տարոնի բաժանմունքի քննիչ Զորի Բաբայանի կայացրած որոշումը:
Համաձայն քննիչի որոշման` վանաձորցի Ռոբերտ Հովհաննիսյանի նկատմամբ քրեական գործ է հարուցվել ՀՀ քրօր-ի 112 հոդվածի առաջին մասի հատկանիշներով, այն է` դիտավորությամբ առողջությանը ծանր վնաս պատճառելը:
Փաստաբանը պահանջել էր կարճել իր պաշտպանյալի նկատմամբ հարուցված քրեական գործով վարույթը:
Խնդրի մասին նա տեղյակ էր պահել նաեւ ՀՀ գլխավոր դատախազ Գեւորգ Կոստանյանին:
2013 թվականի սեպտեմբերի 16-ին որովայնի շրջանում թափանցող մարմնական վնասվածքով Վանաձորի բժշկական կենտրոն էր ընդունվել Կ. Ք.-ն` հայտարարելով, որ վնասվածքը ստացել է վայր ընկնելու հետեւանքով: Դեպքից երկու ժամ անց Ռոբերտ Հովհաննիսյանը մեղայականով ներկայացել է ոստիկանություն, եւ հայտնել է, որ տուժողի վնասն ինքն է պատճառել: Նա պատմել է, որ ծագած վեճի ժամանակ խլել է տուժողի ձեռքում առկա դանակն ու տուժողի դանակով հարվածել վերջինիս:
Փաստաբանը տեղեկացնում է, որ թե տուժողը, թե մեղադրյալը երթուղայինի վարորդներ են: Դեպքի օրը ոչ ճիշտ վազանց կատարելու հետեւանքով նրանց միջեւ միջադեպ է տեղի ունեցել: Տուժողը փորձել է դանակով հարվածել իր պաշտպանյալին, վերջինս էլ նրա ձեռքից խլել է դանակն ու այդ դանակով մեկ անգամ հարվածել տուժողին:
Կարդացեք նաև
«Այստեղ չկա անհրաժեշտ պաշտպանության սահմանազանցում: Իմ պաշտպանյալի բոլոր գործողությունները ուղղված են եղել իրեն պաշտպանելու, եւ դա անհրաժեշտ պաշտպանության վիճակում գործելու օրինակ է: Թեեւ մեծ հույսեր ու ակնկալիքներ չունեի, բայց գլխավոր դատախազի մոտ գործի զեկուցման ընթացքում վերջինս հանգեց այն կարծիքին, որ այստեղ իրոք առկա է անհրաժեշտ պաշտպանության վիճակ: Այդ ընթացքում Լոռու մարզի դատախազության ավագ դատախազ Սոս Տոնոյանը որոշում կայացրեց ընտրված խափանման միջոց կալանավորումը վերացնելու մասին: Որոշման մեջ նշված է, որ Ռոբերտ Հովհաննիսյանը գործել է անհրաժեշտ պաշտպանության վիճակում, ինչը, հետեւաբար, ենթադրում է, որ նաեւ քրեական գործով վարույթը կկարճվի»,- «Առավոտի» հետ զրույցում ասում է փաստաբան Ռուբեն Հակոբյանը` նկատելով, որ առանց ՀՀ գլխավոր դատախազի` գործի հանդեպ դրսեւորած օբյեկտիվ, անաչառ եւ անկողմնակալ մոտեցման, սայլը տեղից չէր շարժվի:
«Ողջունելի է, նաեւ հուսադրող է: Կարծում եմ, որ դատախազը ոչ միայն այս գործով նման վերաբերմունք դրսեւորեց, այլ ցանկացած գործով էլ այդպես կվարվի»,- եզրափակում է Ռուբեն Հակոբյանը:
ԱՆՈՒՇ ԲՈՒԼՂԱԴԱՐՅԱՆ
Վանաձոր
«Առավոտ» օրաթերթ
