«Լեզվի մասին» օրենքի 3-րդ հոդվածի համաձայն՝ «Հայաստանի Հանրապետությունը ներկայացնող անձանց պաշտոնական ելույթների լեզուն հայերենն է»: Այս դրույթը հիշեցնելով՝ «Առավոտն» այսօր վարչապետ Տիգրան Սարգսյանից հետաքրքրվեց, թե ինչո՞ւ է նա, հատկապես Մաքսային միությանն անդամակցելու մտադրության վերաբերյալ հայտարարությունից հետո, այն միջոցառումների ընթացքում, որտեղ ներկա է ռուսական կողմ՝ լինի հուշարձանի բացում կամ մամուլի ասուլիս՝ զանց առնում մեր օրենքի այդ դրույթը:
Տիգրան Սարգսյանն ի պատասխան ասաց. «Խոստանում եմ, որ այսուհետ ավելի ուշադիր կլինեմ»: Սակայն նաեւ նշեց, թե ինքը բազմիցս առիթներ է ունեցել անգլերեն ելույթ ունենալու եւ որեւէ մեկն իրեն դիտողություն չի արել, թե ինչու է խոսել անգլերեն:
Իր իսկ ներկայացրած բացատրությունը հետեւյալն էր, թե անգլերենի տարածվածությունը նկատի ունենալով՝ վտանգ չի զգացվում, իսկ ռուսերենի իմաստով՝ այդ լեզվի գերիշխող դիրքի վերաբերյալ պահպանված հիշողությունը ստիպում է զգոն լինել. «Ուշադիր պետք է լինենք մայրենիի նկատմամբ, եւ ես այսուհետ ավելի ուշադիր կլինեմ»:
Ավելի ուշ պատասխանելով մեկ այլ հարցի՝ հայտարարեց, թե Մաքսային միությանն անդամակցությունը բխում է հայ ժողովրդի շահերից: Եվ մանրամասն անդրադարձավ, թե ինչու այդ գիտակցումը չկար այնժամ, երբ Հայաստանը քայլեր էր կատարում՝ Եվրոպական միության հետ ստորագրելու Ասոցացման համաձայնագիր: Մաքսային միությանն անդամակցությունն, ըստ նրա, հիմքեր է ստեղծում կայուն տնտեսական զարգացման համար:
Կարդացեք նաև
Տեսանյութը՝ HenaranAkumb-ի
