Քանի դեռ չկան ուղեւորահոսքի հետազոտության հաշվարկները, Երեւանի հասարակական տրանսպորտի ուղեվարձի սակագինը չի կարող ձեւավորվել: Այսօր Երեւանի քաղաքապետարանում տեղի ունեցած հասարակական տրանսպորտի ուղեվարձի հարցը քննարկող հանձնաժողովի նիստում ասաց Երեւանի փոխքաղաքապետ Վահե Նիկոյանը:
Նոյեմբերի 20-ից դեկտեմբերի 20-ը IPSC կազմակերպությունը՝ Ասիական բանկի ֆինանսավորմամբ, մեկ ուղեւորի միջին փոխադրման արժեքը պարզելու համար իրականացրել է ուղեւորահոսքի հետազոտություն: Ինչպես պարոն Նիկոյանն ասաց, հետազոտությունը կատարվել է գաղտնի եւ այդ մասին ո՛չ վարորդներն են իմացել, ո՛չ էլ՝ ուղեւորները, որպեսզի չազդի ուղեւորահոսքի իրական պատկերի վրա: «Փոխադրողների միության» նախագահ Հրանտ Եղիազարյանը վստահեցրեց, որ առաջին մի քանի ժամերին է գաղտնիությունը եղել, դրանից հետո վարորդները իմացել են:
Հրանտ Եղիազարյանը հանձնաժողովին կոչ արեց արագացնել աշխատանքները, քանի որ ըստ նրա, «տնտեսվարողների վիճակը այս վերջին ամիսներին վատթարացել է, ահավոր վատ վիճակում են գտնվում: Եթե չարագացնեք, հասարակական տրանսպորտը կաթվածահար կլինի շատ շուտով»:
Հանձնաժողովն իր աշխատանքը կշարունակի հունվարին:
Կարդացեք նաև
Նյութի մանրամասները՝ առաջիկայում
Լուսինե ԲՈՒԴԱՂՅԱՆ
