Այսօր տարեվերջյան ամփոփիչ ասուլիսում ՀՀԿ խոսնակ Էդուարդ Շարմազանովը հպարտությամբ արձանագրեց, որ 2013-ի երկու ընտրություններում ՀՀԿ-ն լուրջ հաջողություն է գրանցել՝ նախագահական եւ Երեւանի ավագանու: Իսկ այն ուժերը, որ խոսում են այդ ընտրությունների ձախողումից, ըստ Շարմազանովի, այնքան ռեսուրս չունեին, որ մասնակցեին նախագահական ընտրություններին, իսկ այդ ընտրություններում ձայների 1/3-ը հավաքած Րաֆֆի Հովհաննիսյանը շատ արագ փոշիացրեց այդ հանրային վստահությունը:
Իսկ երբ խոսք գնաց գազային համաձայնագրերից, պարոն Շարմազանովը նկատեց.«Եթե այդքան կործանարար, եթե այդքան դավաճանական, եթե այդքան ճակատագրական էր այդ համաձայնագիրը, այդքան վատն էր՝ բա ո՞ւր էր ԲՀԿ խմբակցության ղեկավարը, որ չեկավ այդ համաձայնագրի քննարկումներին: Ո՞ւր էր «Ժառանգության» հիմնադիրը, որ չեկավ, իսկ ՀԱԿ հիմնադիր Լեւոն Տեր-Պետրոսյանն իր ելույթում ինչին ասես անդրադարձավ՝ բացի գազի համաձայնագրերից: Եթե այդքան կործանարար էր, թող անդրադառնար: Ազնիվ չէ մինչեւ ժամը մեկը լինել ռուսամետ, մեկից հինգը արեւմտամետ, հինգից հետո էլ՝ իշխանամետ»:
Մելանյա ԲԱՐՍԵՂՅԱՆ
